INAI laulau dekenai dahaka ia idau? Oibe, inai laulau dekenai taunimanima idia noho. Idia be tau bona hahine ginigunadia. Daika ese idia ia havaraia? Dirava ese. Iena ladana oi diba, a? Iena ladana be Iehova. Bona inai tau bona hahine edia ladadia be Adamu bona Heva.

Iehova Dirava ese Adamu be inai bamona ia karaia. Tano ena kahu haida ia abia bona unai kahu amo tauanina goevadaena ta ia karaia. Bena laga be iena udu baubau lalonai ia hiriria vareai, bona Adamu ia mauri.

Iehova Dirava ese Adamu dekenai gaukara ta ia henia. Adamu ia hamaoroa animal idauidau edia ladadia do ia atoa. Reana nega daudau Adamu ese animal ia itaia, unai amo idia ibounai dekenai ladana namona ia henia diba. Animal idauidau edia ladana ia atoa noho lalonai gau ta ia itaia. Unai gauna oi diba, a?

Animal ibounai be mai edia turana. Tama elefant bona sina elefant, bona tama laiona bona sina laiona. To Adamu be turana lasi. Unai dainai Iehova ese Adamu ia hamahutaia, bona ena ruduna turiana ta ia kokia. Unai turia amo, Iehova ese Adamu totona hahine ta ia karaia, bona ia be ena adavana ai ia lao.

Unai neganai Adamu ia moale bada herea! Bona reana Heva ia moale bada unai gabu hairaina lalonai ia noho! Natudia idia havaraia bona mai moale ida idia noho hebou diba.

Iehova ia ura Adamu bona Heva idia noho ela bona hanaihanai. Ia ura idia ese tanobada ibounai idia hahairaia, Eden umana bamona. Unai gaukara idia laloa neganai, reana Adamu bona Heva idia moale bada herea! Oi danu oi ura tanobada be hairai gabuna ai oi halaoa, a? To Adamu bona Heva edia moale be ia ore haraga. Ena badina mani ita tahua.