MANI tanobada oi itaia! Gau ibounai be mai edia hairai! Rei bona au, flaoaflaoa bona animal ibounai mani oi itaia. Elefant bona laiona oi makaia diba, a?

Inai gabu mai hairaina be edena bamona ia vara? Dirava be ita totona tanobada ia hegaegaelaia dalana mani ita laloa.

Gau ginigunana be, Dirava ese rei ia karaia tano kopina ia koua totona. Bona tubutubu gaudia maragidia, uda bona au idauidau ia karaia. Unai tubutubu gaudia ese tanobada idia hahairaia. To unai sibona idia karaia lasi. Unai gaudia momo amo aniani mamina namo hereana ita abia.

Gabeai Dirava ese davara ena gwarume bona guba ena manu ia karaia. Sisia, pusikasi bona hosi ia karaia; animal badadia bona maragidia. Oiemu ruma kahirakahira dekenai edena animal idia noho? Dirava ese unai gau ibounai be ita totona ia karaia dainai, ita moale be namo, ani?

Dokonai, Dirava ese tanobada ena kahana ta be gabu hairaina ai ia halaoa. Unai gabu ia gwauraia Eden umana. Ia be gabu hereadaena. Ena kahana ibounai be hairai momokani. Bona Dirava ia ura tanobada ibounai be ia karaia gabu mai hairaina bamona ai ia lao.

To inai gabu ena laulau mani oi itaia lou. Dirava ia itaia gau ta ia noho lasi, unai gauna oi diba, a? Mani ita itaia.