ITA abia gau namodia ibounai be Dirava amo idia mai. Dina, hua bona hisiu ia karaia, unai amo dina bona hanuaboi ai diari ita abia diba. Bona Dirava ese tanobada ia karaia ita noholaia totona.

To dina, hua, hisiu bona tanobada be Dirava ese ia karaia gau ginigunadia lasi. Ia karaia gauna ginigunana oi diba, a? Dirava ese ia bamona taudia haida ia karaia guna. Unai taudia ita itaia diba lasi, Dirava ita itaia lasi bamona. Baibel ese idia ia gwauraia aneru. Dirava ese aneru ia karaia ia danu guba dekenai idia noho totona.

Dirava ese ia karaia aneru ginigunana be hereadae. Ia be Dirava ena Natuna ginigunana, bona ena Tamana ida ia gaukara hebou. Dirava ia durua gau ibounai idia karaia totona. Ia ese Dirava ia durua dina, hua, hisiu bona iseda tanobada danu idia karaia totona.

Unai neganai tanobada ena toana be edena bamona? Matamanai ta be tanobada dekenai ia noho diba lasi. Gau ta ia noho lasi, to davara ese tano ibounai ia koua. To Dirava ia ura taunimanima be tanobada dekenai do idia noho. Unai dainai ita totona gau idauidau ia hegaegaelaia matamaia. Dahaka ia karaia?

Gau ginigunana be tanobada ese diari ia abia be namo. Unai dainai dina ena diari amo Dirava ese tanobada ia hadiaria. Unai bamona ia karaia dainai dina bona hanuaboi ita abia. Gabeai Dirava ena siahu amo tano be davara amo ia daekau.

Matamanai gau ta be tano latanai ia noho lasi. Iena toana be inai laulau dekenai oi itaia bamona. Flaoaflaoa, au eiava animal ta ia noho lasi. Davara dekenai gwarume idia noho lasi danu. Tanobada be gabu hairaina ai ia lao bona taunimanima bona animal ese idia noholaia totona, Dirava ese gaukara badana do ia karaia.