KAINO bona Abela mani oi itadia. Idia ruaosi idia tubu daekau vadaeni. Kaino be biru tauna ai ia lao. Ia be uma aniani bona au huahua ia hadoa.

Abela be mamoe naria tauna ai ia lao. Mamoe maragidia naria karana ia ura henia. Idia tubu daekau bona mamoe badadia ai idia lao, bona nega sisina murinai Abela be mamoe seri bada herea ia naria.

Dina ta Kaino bona Abela ese harihari gaudia be Dirava dekenai idia mailaia. Kaino be ia hadoa aniani haida ia mailaia. Bona Abela be ena mamoe namo hereana ta ia mailaia. Iehova be Abela bona ena harihari gauna dekenai ia moale. To Kaino bona ena harihari gauna dekenai ia moale lasi. Ena badina oi diba, a?

Abela ena harihari gauna ese Kaino ena harihari gauna ia hereaia sibona lasi. To badina Abela be tau namona. Iehova bona ena kakana ia lalokau henia. To Kaino be dika; iena tadina ia lalokau henia lasi.

Unai dainai Dirava ese Kaino ia hamaoroa ena kara ia haidaua be namo. To Kaino ia kamonai lasi. Ia badu bada badina Dirava ese Abela ia ura henia. Unai dainai Kaino be Abela dekenai ia gwau, ‘Uma gabu dekenai ita raka namo.’ Unuseniai, sibodia idia noho neganai, Kaino ese ena tadina Abela ia botaia. Ia botaia badabada dainai ia hamasea. Kaino ia karaia karana be dika momokani, ani?

Ena be Abela ia mase, to Dirava ese ia laloatao noho. Abela be namo, bona unai bamona taudia be Iehova ese ia laloaboio lasi. Unai dainai dina ta Iehova ese Abela do ia hatorea isi lou. Unai negai Abela be do ia mase lou lasi. Inai tanobada dekenai do ia noho ela bona hanaihanai. Abela bamona taudia ita hedavari henidia be namo herea, ani?

To Dirava be Kaino bamona taudia dekenai ia moale lasi. Unai dainai Kaino ese ena tadina ia alaia murinai, Dirava ese ia panisia dalana be ena ruma bese taudia amo gabu daudau dekenai ia lulua lao. Kaino be tanobada ena kahana ta dekenai ia lao neganai, iena taihuna ta danu ia abia lao, bona ia be iena adavana ai ia lao.

Gabeai Kaino bona ena adavana be natudia idia havaraia. Adamu bona Heva edia natudia haida idia headava, bona natudia idia havaraia danu. Daudau lasi tanobada dekenai taunimanima be idia hutuma. Idia haida edia sivarai mani ita itaia.