BEMA tau ta be oi dekenai ia raka mai bona iena lata be emu ruma ena guhi bamona, dahaka do oi laloa? Unai be tau bada herea momokani! Guna unai bamona tatau badadia be tanobada dekenai idia noho. Baibel ese ia hahedinaraia edia tamadia be guba amo idia diho anerudia. To unai be edena bamona ia vara?

Laloaboio lasi, aneru dikana Satani ia bisi bada hekwakwanai ia havaraia totona. Ia ura Dirava ena aneru danu ia hakaudia kerere. Gabeai unai aneru haida ese Satani idia kamonai henia. Dirava ese guba dekenai ia henia gaukara idia rakatania. Bona tanobada dekenai idia diho mai bona taunimanima edia tauanina idia karaia. Ena badina oi diba, a?

Baibel ia gwau badina unai Dirava ena guba natudia ese tanobada dekenai hahine hairaidia idia itaia bona idia ura unai hahine danu idia noho. Unai dainai, tanobada dekenai idia diho mai bona unai hahine idia adavaia. Baibel ia gwau unai be kerere badina Dirava ese aneru ia karaia guba dekenai idia noho totona.

Unai aneru bona edia hahine ese natudia idia havaraia neganai, unai natudia be idau. Reana matamanai edia toana be ia idau momokani lasi. To gabeai idia be tatau badadia ai idia lao bona idia goada momokani.

Unai tatau badadia be taunimanima dikadia. Bona idia be bada herea bona goada momokani dainai, idia ese taunimanima idia hahisidia. Taunimanima ibounai idia doridia kara dikadia idia karaia totona, idia bamona.

Enoka ia mase vadaeni, to tanobada dekenai tau ma ta ia noho bona ia be tau namona. Iena ladana be Noa. Ia be hanaihanai Dirava ena ura ia karaia.

Dina ta Dirava ese Noa ia hamaoroa nega ia ginidae vadaeni kara dika taudia ibounai do ia haorea. To Dirava ese Noa, ena ruma bese, bona animal momo do ia hamauridia. Dirava ese unai ia karaia dalana mani ita itaia.