INAI laulau dekenai oi itaia memero rua edia kara be idau momokani, ani? Edia ladadia oi diba, a? Ia labana noho merona be Esau bona mamoe ia naria merona be Iakobo.

Esau bona Iakobo be Isako bona Rebeka edia hekapa natudia. Edia tamana Isako ese Esau ia ura henia bada, badina ia be labana tauna namona bona ruma bese totona aniani ia mailaia. To Rebeka ese Iakobo ia ura henia bada badina ia be manau.

Edia tubuna Aberahamo be ia do mauri noho, bona Iehova ia kikilaia neganai, Iakobo ia ura bada ia kamonai. Aberahamo ena mauri lagani be 175 neganai ia mase, unai neganai memero rua edia mauri lagani be 15.

Esau ena mauri lagani be 40 neganai, Kanana kekeni rua ia adavaia. Unai ese Isako bona Rebeka edia lalona ia hahisia bada, badina unai hahine ese Iehova idia tomadiho henia lasi.

Bena dina ta, gau ta ia vara dainai, Esau be iena tadina Iakobo dekenai ia badu. Nega ia ginidae Isako ese ena vara guna natuna do ia hanamoa. Esau ia vara guna dainai ia laloa ia ese hahenamo ia abia be maoro. To Esau be ena vara guna ahuna be Iakobo dekenai ia hoihoilaia vadaeni. Danu, idia ruaosi idia vara neganai, Dirava ia hereva vadaeni, Iakobo ese hahenamo do ia abia. Bona unai bamona ia vara. Isako ese ena natuna Iakobo ia hanamoa.

Gabeai, Esau be unai ia diba neganai, Iakobo dekenai ia badu. Ia badu bada herea dainai, ia gwau Iakobo do ia alaia. Rebeka be unai ia kamonai neganai, ia laloa momo. Unai dainai iena adavana Isako ia hamaoroa: ‘Bema Iakobo danu ese Kanana kekeni ta ia adavaia, unai be dika bada herea.’

Unai dainai Isako ese ena natuna Iakobo ia boiria bona ia hamaoroa: ‘Kanana kekeni ta oi adavaia lasi. To emu tubuna Betuela ena ruma Harana dekenai oi lao. Iena natuna Labana ena kekeni ta oi adavaia.’

Iakobo be ena tamana ia kamonai henia, bona maoromaoro ena varavara idia noho gabu daudauna, Harana dekenai, ia lao.