LAULAU ta ta mani oi itaia. Idia ta ta be Iehova ese Aigupito dekenai ia siaia hisihisi idia hahedinaraia. Laulau ginigunana dekenai oi itaia diba, Arona be ena au amo Naila Sinavaina ia botaia. Ia botaia neganai, sinavai be rara ai ia lao. Gwarume idia mase bona sinavai ia bodaga matamaia.

Unai murinai, Iehova ese paroparo ia siaia Naila Sinavaina amo idia daekau. Aniani gabua aveni, paraoa gabua pani bona taunimanima edia mahuta gabudia be paroparo amo idia honu. Paroparo idia mase neganai, Aigupito taudia ese idia haboua bona edia bonana be tano ibounai dekenai ia daekau.

Bena Arona ese tano ia botaia bona kahu be namo ai ia lao. Idia be roho gaudia maragidia bona idia koria diba. Namo be hisihisi ihatoina.

Unai murinai idia vara hisihisi 7 ese Aigupito taudia sibodia idia hadikaia, to Israela taudia lasi. Hisihisi namba 4 be lao badadia, Aigupito taudia edia ruma lalonai idia vareai. Hisihisi namba 5 ese animal ia hadikaia. Aigupito taudia edia mamoe, boromakau bona nani momo idia mase.

Gabeai, Mose bona Arona ese lahi kahuna idia abia bona lai dekenai idia negea daekau. Idia ese taunimanima bona animal dekenai toto dikadia idia havaraia. Unai be hisihisi namba 6.

Unai murinai Mose ese guba dekenai ena imana ia abia isi, bona Iehova ese guba ena boiboi bada bona aisi meduna ia siaia. Aigupito taudia be guna unai bamona aisi meduna idia mamia lasi.

Hisihisi namba 8 be kwadi orea badana. Guna kwadi idia mai, to momo herea unai bamona nega tamona idia mai lasi. Aisi meduna ese ia hadikaia lasi gaudia ibounai be kwadi ese idia ania ore.

Hisihisi namba 9 be dibura masemase. Dina toi lalonai dibura ese tano ibounai ia koua, to Israela taudia idia noho gabudia be mai edia diari.

Gabeai, Dirava ese ena taunimanima ia hamaorodia nani eiava mamoe maragina ena rara be edia iduara ena kahana kahanai do idia atoa. Bena Dirava ena aneru ese Aigupito ia hanaia. Aneru ese rara ia itaia neganai, unai ruma lalonai ta ia alaia lasi. To Dirava ena aneru ese iduara kahana kahanai rara idia noho lasi ruma ibounai dekenai idia noho taunimanima, bona animal edia vara guna natudia ia hamasea. Unai be hisihisi namba 10.

Unai hisihisi ginigabena murinai, Farao ese Israela taudia ia siaia lao. Dirava ena taunimanima idia hegaegae vadaeni, bona unai hanuaboi ai Aigupito idia rakatania.