MOSE be gabu daudau amo ia mai Sinai ororona dekenai ena mamoe edia rei ia tahua totona. Unuseniai ia itaia au ta be lahi ese ia araia, to unai au ia gabua lasi!

Mose ia laloa, ‘Inai be idau momokani. Do lau lao kahirakahira lau itaia namonamo totona.’ Ia lao neganai, gado ta be au huana amo ia mai, ia gwau: ‘Oi mai kahirakahira lasi. Emu tamaka oi kokia, badina oi be tano helagana dekenai oi gini noho.’ Dirava be aneru ta amo ia hereva, unai dainai Mose ese ena vairana ia koua.

Bena Dirava ia gwau: ‘Egu taunimanima edia hisihisi Aigupito dekenai lau itaia vadaeni. Unai dainai do lau hamauridia, bona oi do lau siaia Aigupito amo egu taunimanima oi hakaudia totona.’ Iehova be Kanana tano hairaina dekenai ena taunimanima do ia abia mai.

To Mose ia gwau: ‘Lau be hegeregere lasi. Edena bamona unai do lau karaia? To bema lau lao, Israela taudia be lau dekenai do idia gwau, “Daika ese oi ia siaia?” Unai neganai dahaka do lau gwau?’

Dirava ia haere, ‘Inai bamona oi hereva. “IEHOVA, Aberahamo ena Dirava, Isako ena Dirava bona Iakobo ena Dirava ese lau ia siaia.” ’ Iehova ma ia gwau: ‘Inai be lauegu ladana ela bona hanaihanai.’

Mose ia haere: ‘To reana lau do idia abia dae lasi bema lau gwau oi ese lau oi siaia.’

Dirava ia henanadai: ‘Oiemu imana dekenai dahaka oi dogoatao?’

Mose ia haere: ‘Au ta.’

Dirava ia gwau: ‘Tano dekenai oi negea.’ Mose ia karaia neganai, au be gaigai ai ia lao. Bena Iehova be Mose dekenai hoa kara ma ta ia hahedinaraia. Ia gwau: ‘Emu imana be emu dabua lalonai oi atoa.’ Mose ia atoa, bona ena imana ia kokia neganai, ia kurokuro momokani sinou bamona! Toana be lepera gorere ia abia bamona. Bena Iehova ese Mose dekenai siahu ia henia hoa gauna ihatoina ia karaia totona. Dokonai, Ia gwau: ‘Inai hoa karadia oi karaia neganai, Israela taudia do idia abia dae lau ese oi lau siaia.’

Unai murinai, Mose ia giroa bona Ietero ia hamaoroa: ‘Mani emu kara, egu varavara Aigupito dekenai lau giroa lou. Lau ura itaia idia be edena bamona.’ Vadaeni, Ietero ese Mose ia siaia bona Mose be Aigupito dekenai ia giroa.