INAI laulau dekenai Daina ese ia vadivadi henia kekeni oi itaia, a? Ia be Kanana dekenai idia noho kekeni haida ia vadivadi henia noho. Bema iena tamana Iakobo ia diba, do ia moale, a? Unai henanadaia ena haere ita abia totona, Aberahamo bona Isako edia lalohadai Kanana hahine dekenai mani ita laloa.

Aberahamo ia ura ena natuna Isako ese Kanana kekeni ta ia adavaia, a? Lasi. Isako bona Rebeka idia ura edia natuna Iakobo ese Kanana kekeni ta ia adavaia, a? Lasi. Ena badina oi diba, a?

Badina Kanana taudia ese dirava koikoidia idia tomadiho henia. Idia be taunimanima namodia lasi headava totona, bona idia be taunimanima namodia lasi tura henidia totona. Unai dainai ita diba momokani Iakobo do ia moale lasi bema ia diba ena natuna kekeni be unai Kanana kekenidia ia tura henia.

Momokani Daina ese hekwakwanai ia davaria. Inai laulau dekenai ia noho Kanana tauna oi itaia, a? Iena ladana be Sekema. Dina ta Daina ia vadivadi neganai, Sekema ese ia dogoatao bona ia danu ia mahuta hebou. Unai be kerere, badina headava tatau bona hahine sibona idia mahuta hebou be maoro. Sekema ese Daina dekenai ia karaia kara dikana dainai hekwakwanai momo idia vara.

Daina ena taihudia be unai sivarai idia kamonai neganai idia badu momokani. Iena taihuna rua, Simeona bona Levi, idia badu bada dainai tuari kaia idia abia bona hanua lalonai idia vareai. Hanua tatau idia hoa. Idia bona edia tadikaka ese Sekema bona unai hanua ena tatau ibounai idia alaia. Iakobo ena natudia ese unai kara dika idia karaia dainai Iakobo ia badu.

Unai hekwakwanai ibounai be edena bamona ia matamaia? Badina Daina ese Dirava ena taravatu idia kamonai lasi taudia ia tura henidia. Ita ura lasi unai bamona taudia ita tura henidia, ani?