IOSEPA ese ena hemami ia biagua diba lasi. Iena hesiai taudia ibounai ia hamaorodia ruma do idia rakatania. Iosepa be ena tadikaka sibona danu ia noho neganai, ia tai matamaia. Mani oi laloa, reana ena tadikaka idia hoa bada, badina ia tai ena badina idia diba lasi. Gabeai ia gwau: ‘Lau be Iosepa. Egu tamana be ia do mauri noho, a?’

Iena tadikaka idia hoa bada dainai, idia hereva lasi. Idia gari. To Iosepa ia gwau: ‘Mani umui mai kahirakahira.’ Idia mai kahirakahira neganai, ia gwau: ‘Lau be emui tadikaka Iosepa, Aigupito taudia dekenai umui hoihoilaia tauna.’

Iosepa be hebogahisi dalanai ia hereva noho: ‘Lau umui hoihoilaia dainai sibona ta ta dekenai kerere umui atoa lasi. Momokani Dirava ese lau ia siaia Aigupito dekenai taunimanima hamauridia totona. Farao ese lau be tano ibounai ena biaguna ai ia halaoa. Unai dainai umui giroa haraga egu tamana dekenai bona inai sivarai umui gwauraia. Bona umui hamaoroa ia mai bona iniseniai ia noho.’

Bena Iosepa ese ena tadikaka ibounai ia rosia bona ia kisi henidia. Farao be Iosepa ena tadikaka idia mai ena sivarai ia kamonai neganai, Iosepa ia hamaoroa: ‘Namona be hosi idia veria gaudia idia abia lao bona edia tamana bona edia ruma bese idia abia mai iniseniai. Aigupito ena tano namo herea ta do lau henidia.’

Unai bamona idia karaia. Iosepa ena tamana be ena ruma bese ibounai danu Aigupito dekenai idia mai neganai, Iosepa ese ena tamana ia hedavari henia, inai laulau dekenai oi itaia bamona.

Iakobo ena bese be bada herea. Aigupito dekenai idia mai neganai, Iakobo, ena natuna bona ena tubuna ibounai be 70. To edia adavadia, bona hesiai taudia momo danu idia mai. Idia ibounai be Aigupito dekenai idia noho. Edia ladadia idia gwauraia Israela taudia, badina Dirava ese Iakobo ena ladana ia haidaua bona ia gwauraia Israela. Israela taudia be Dirava ia ura henia bada taudia ai idia lao, gabeai unai do ita herevalaia.