AIGUPITO dekenai Iosepa idia abia lao neganai, ena lagani be 17 sibona. Unuseniai ia be tau ta ladana Potifara dekenai idia hoihoilaia. Potifara be Aigupito ena king, Farao, ena gaukara tauna ta.

Iosepa be Potifara totona ia gaukara goada. Unai dainai Iosepa ia bada neganai, Potifara ese siahu ia henia ena ruma ia naria totona. To dahaka dainai Iosepa be dibura ruma ai ia noho? Potifara ena hahine dainai.

Iosepa ia bada neganai, ia be mai ena hairai bona Potifara ena adavana ia ura idia mahuta hebou. To Iosepa ia diba unai be kerere bona do ia karaia lasi. Potifara ena adavana ia badu. Unai dainai ena tau ia giroa neganai, ia koikoi, ia gwau: “Iosepa ia ura lau danu ia mahuta hebou!” Potifara ese ena adavana ena hereva ia abia dae bona Iosepa dekenai ia badu. Unai dainai dibura ruma ai ia atoa.

Dibura ruma ia naria tauna ia itaia Iosepa be mero namona. Unai dainai dibura taudia naria tauna ai ia halaoa. Gabeai, Farao be ena uaina bubua tauna bona ena paraoa gabua tauna dekenai ia badu, bona dibura ruma ai ia atodia. Hanuaboi ta idia ruaosi idia nihi, to edia nihi ena anina idia diba lasi. Murina dinana ai Iosepa ia gwau: ‘Lau dekenai emui nihi umui gwauraia.’ Bona idia gwauraia neganai, Dirava ena heduru amo, Iosepa ese edia nihi ena anina ia gwauraia.

Iosepa be uaina bubua tauna ia hamaoroa: ‘Dina toi murinai dibura ruma do oi rakatania, bona Farao ena uaina bubua tauna ai do oi lao lou.’ Iosepa ma ia gwau: ‘Oi raka-lasi neganai, egu sivarai Farao dekenai oi hadibaia, bona lau oi durua inai gabu lau rakatania totona.’ To Iosepa ese paraoa gabua tauna ia hamaoroa: ‘Dina toi murinai Farao ese emu kwarana do ia utua.’

Dina toi murinai Iosepa ia hereva bamona ia vara. Farao ena paraoa gabua tauna ena kwarana idia utua. To uaina bubua tauna be dibura ruma ia rakatania bona king ia hesiai henia lou. To uaina bubua tauna ese Iosepa ia laloaboio! Farao dekenai ena sivarai ia gwauraia lasi, bona Iosepa be dibura ruma ai ia noho.