IOSEPA ia ura diba bema ena kakadia 10 be hebogahisi lasi taudia eiava. Unai dainai ia gwau: ‘Umui be spai taudia. Umui mai emai tano ena manoka umui itaia totona.’

Idia gwau: ‘Lasi, unai bamona lasi. Ai be hereva momokani taudia. Ai ibounai be tadikaka. Ai be 12. To tamona ia boio, bona mero dokona be tamana danu ia noho.’

Iosepa ena vairana ia ha-aukaia, ia ura ena kakadia idia laloa edia hereva ia abia dae lasi. Iena kakana Simeona be dibura ruma lalonai ia atoa, bona ena tadikaka nain dekenai aniani ia henia bona ia siaidia. To idia ia hamaoroa: ‘Umui giroa neganai, emui tadina danu umui abia mai.’

Kanana dekenai idia giroa neganai, edia tamana Iakobo dekenai idia vara gaudia ibounai idia gwauraia. Iakobo ia lalohisihisi bada. Mai taitai danu ia gwau: ‘Iosepa ia boio, bona hari Simeona danu ia boio. Egu mero maragina, Beniamina, do umui abia lao diba lasi.’ To edia aniani ia ore gwauraia neganai, Iakobo ese Beniamina ia koua lasi, to idia danu Aigupito dekenai ia siaia lao, unai amo aniani idia abia diba.

Vadaeni Iosepa ia itaia ena tadikaka idia mai. Ena tadina Beniamina ia itaia neganai, ia moale bada. To idia diba lasi inai tau badana be Iosepa. Iosepa ese ena kakadia 10 ia tohoa totona gau ta ia karaia.

Iena hesiai taudia ia hamaorodia ena kakadia edia puse ibounai aniani amo idia hahonua. To idia itaia lasi neganai, iena siliva kapusi be Beniamina ena puse lalonai idia atoa. Gabu idia rakatania bona idia lao sisina daudau murinai, Iosepa ese ena hesiai taudia ia siaia. Idia davaridia neganai, ena hesiai taudia idia gwau: ‘Dahaka dainai emai biaguna ena siliva kapusi umui henaoa?’

Idia ibounai idia gwau: ‘Ena kapusi ai henaoa lasi. Bema kapusi be ai ta ena puse lalonai umui davaria, umui alaia.’

Unai dainai hesiai taudia ese puse iboudiai idia sekea, bona kapusi be Beniamina ena puse lalonai idia davaria, inai laulau dekenai oi itaia bamona. Hesiai taudia idia gwau: ‘Umui ibounai umui lao, to Beniamina be ai danu do ia mai.’ Tadikaka 10 be dahaka do idia karaia?

Idia ibounai, Beniamina danu, Iosepa ena ruma dekenai idia giroa. Iosepa ese ena kakadia ia hamaoroa: ‘Umui ibounai umui giroa diba, to iniseniai Beniamina be egu hesiai tauna bamona ia noho be namo.’

Unai neganai Iuda ia hereva, ia gwau: ‘Bema lau giroa to mero be lasi, egu tamana do ia mase badina ia lalokau henia bada. Mani emu kara, lau oi dogoatao emu hesiai tauna bamona, to mero oi siaia.’

Iosepa ia itaia ena kakadia edia kara be hari ia idau. Idia be hebogahisi taudia. Iosepa do ia karaia karana mani ita itaia.