NOA bona ena ruma bese be lagatoi amo idia raka-lasi neganai, ia karaia gauna ginigunana oi diba, a? Dirava dekenai boubou eiava harihari gauna ta ia henia. Henunai ia noho laulau dekenai oi itaia bamona. Abata amo Dirava ese Noa bona ena ruma bese ia hamauria dainai, Noa ese unai animal ia gabua Dirava ia tanikiu henia totona.

Oi laloa Iehova be unai harihari gauna dekenai ia moale, a? Oibe, ia moale. Unai dainai Noa dekenai ia gwauhamata inai tanobada be abata amo do ia hadikaia lou lasi.

Nega sisina murinai tano ia kaukau, bona Noa bona ena ruma bese be lagatoi murimurinai mauri matamatana idia hamatamaia. Dirava ese idia ia hanamoa bona ia hamaorodia: ‘Natuna momo do umui havaraia. Do umui hutuma ela bona taunimanima be tanobada ibounai dekenai do idia noho.’

To gabeai, taunimanima ese abata badana ena sivarai idia kamonai neganai, reana unai bamona abata ia vara lou garina do idia gari. Unai dainai Dirava be taunimanima ia hadibaia lou totona gau ta ia henia, unai amo ia gwauhamata tanobada ibounai be abata amo do ia hadikaia lou lasi. Idia hadibaia lou totona ia henia gauna oi diba, a? Unai be kevau.

Medu ia diho bena dina ia hedinarai neganai, nega momo kevau be guba dekenai ita itaia. Kevau be mai ena kala hairaidia momo. Nega ta kevau oi itaia vadaeni, a? Laulau dekenai ia noho gauna oi itaia, a?

Dirava ia gwau: ‘Lau gwauhamata abata ta ese taunimanima bona animal ibounai do ia hadikaia lou lasi. Lau egu kevau be ori lalonai lau atoa inai. Kevau ia hedinarai neganai, do lau itaia bona lauegu gwauhamata do lau laloatao.’

Unai dainai kevau oi itaia neganai, dahaka oi laloatao be namo? Oibe, Dirava ena gwauhamata ia gwau, tanobada be abata badana ta amo do ia hadikaia lou lasi.