LOTA bona ena ruma bese be Aberahamo danu Kanana tanona dekenai idia noho. Dina ta Aberahamo ese Lota ia hamaoroa: ‘Tano be bada lasi iseda animal ibounai totona. Mani ita parara. Bema oi be kahana oi lao, vadaeni lau be kahana do lau lao.’

Lota ese tano ibounai ia itaia. Ia itaia kahana namona ta be mai ena ranu bona rei namona iena animal totona. Unai gabu ladana be Ioridane. Unai dainai Lota mai ena ruma bese bona animal danu unuseniai idia lao. To gabeai Sodoma hanua ai idia noho.

Sodoma taudia edia kara be dika momokani. Unai ese Lota ena lalona ia hahisia, badina ia be tau namona. Dirava ia lalohisihisi danu. Gabeai, Dirava ese Lota dekenai aneru rua ia siaia. Lota idia hadibaia Sodoma bona ia kahirakahira hanua Gomora edia dika dainai do ia hadikaia.

Aneru ese Lota idia hamaoroa: ‘Karaharaga! Oiemu adavana bona oiemu natuna kekeni rua oi abia bona inai gabu umui rakatania.’ Lota bona ena ruma bese be idia haraga lasi dainai, aneru ese edia imana idia dogoatao bona hanua amo idia hakaua siri. Bena aneru ta ia gwau: ‘Umui heau mauri! Emui vairana umui giroa lasi. Ororo dekenai umui heau, umui mase garina.’

Lota bona ena natuna kekeni idia kamonai bona Sodoma idia heautania. Nega sisina idia gini lasi, bona murina kahana dekenai idia itaia lasi. To Lota ena adavana be ia kamonai lasi. Idia heau sisina daudau murinai, ia gini bona ia giroa murina kahana ia itaia. Bena Lota ena adavana be damena nadina ai ia lao. Inai laulau dekenai ia oi itaia diba, a?

Unai amo gau namona ta ita dibaia. Ita dekenai ia hahedinaraia Dirava ese ia idia kamonai henia taudia ia hamauria, to kamonai lasi taudia ese edia mauri do idia haboioa.