INAI tauna be ena palai rumana lalonai ia hunia kohu mani oi itaia! Dabua namona ta, golo bona siliva haida idia noho. Ieriko hanuana amo ia abia. To Ieriko ena gaudia dekenai dahaka ia karaia be namo? Oi laloatao, a?

Unai gaudia idia hadikaia ore, bona ena golo bona siliva be Iehova ena palai dubuna ena kohu danu nega tamona idia haboua be namo. Unai dainai ita diba, inai taudia ese Dirava idia kamonai henia lasi. Dirava ena gau idia henaoa. Inai tau ena ladana be Akana, bona ia danu idia noho taudia be ena ruma bese taudia. Ia vara gauna mani ita itaia.

Akana ese inai gaudia ia henaoa murinai, Iosua ese tatau haida ia siaia Ai hanuana idia tuari henia totona. To idia kwalimu lasi. Haida idia mase, bona ma haida idia heau. Iosua ia lalohisihisi bada. Ia hekure, ena vairana be tano dekenai ia atoa diho bona Iehova dekenai ia guriguri: ‘Dahaka dainai inai bamona ia vara ai dekenai?’

Iehova ia haere: ‘Toreisi! Israela ia kara dika vadaeni. Idia hadikaia ore gaudia eiava Iehova ena palai dubuna dekenai henia gaudia idia abia. Idia ese dabua namona ta idia henaoa bona idia hunia. Umui do lau hanamoa lasi ela bona unai gaudia bona ia abia tauna umui hadikaia ore.’ Iehova ese Iosua ia hamaoroa, ia kara dika tauna be ia dekenai do ia hahedinaraia.

Unai dainai, Iosua ese taunimanima ibounai ia haboua, bona Iehova ese kara dika tauna, Akana, ia hahedinaraia. Akana ia gwau: ‘Lau kerere. Dabua hairaina, golo bona siliva haida lau itaia. Lau ura dikadika dainai, lau abia. Egu palai lalonai lau guria. Unuseniai do umui davaria.’

Unai gaudia idia davaria bona Iosua dekenai idia abidia mai neganai, Iosua be Akana dekenai ia gwau: ‘Dahaka dainai oi ese ai oi hadikaia? Hari Iehova ese oi do ia hadikaia danu!’ Unai murinai, taunimanima ibounai ese Akana bona ena ruma bese be nadi amo idia hodoa mase. Unai ese ia hahedinaraia haida edia gau ita abia lasi be namo, ani?

Unai murinai, Israela taudia ese Ai hanua idia tuari henia lou. Unai neganai Iehova ese ena taunimanima ia durudia bona idia kwalimu.