ISRAELA taudia be hekwakwanai idia davaria neganai, Iehova dekenai idia boiboi. Iehova ia kamonai bona idia dekenai gari lasi hakaua taudia ia henia. Baibel ese ia gwauraidia hahemaoro taudia. Iosua be hahemaoro tauna ginigunana, bona ia murinai hahemaoro taudia be Otoniele, Ehuda bona Samiga. To Israela idia durua taudia rua be hahine, idia be Debora bona Iaele.

Debora be peroveta hahinena. Iehova ese dina vaira ai do idia vara gaudia be ia dekenai ia hadibaia guna, bena ia ese Iehova ena hereva be taunimanima dekenai ia gwauraia. Debora danu be hahemaoro hahinena. Ororo kahana hanuana dekenai pama au ta henunai ia helai, bona unuseniai taunimanima edia hekwakwanai ia hamaoromaoroa.

Unai neganai Iabina be Kanana ena king. Ena tuari kariota ibounai be 900. Ena orea be goada herea dainai, Israela taudia momo ia doridia ena hesiai gaukara idia karaia totona. King Iabina ena tuari orea ena biaguna ena ladana be Sisera.

Dina ta Debora ese Hahemaoro Tauna Baraki ia boiria, bona ia hamaoroa: ‘Iehova ia gwau: “Tatau 10,000 oi abia bona Taboro Ororona dekenai oi hakaudia. Unuseniai Sisera do oi davaria. Egu siahu dainai ia bona ena tuari orea do oi halusidia.” ’

Baraki ese Debora ia hamaoroa: ‘Bema lau oi bamoa, do lau lao.’ Debora ese ia bamoa, to Baraki ia hamaoroa: ‘Oi dainai do ita kwalimu lasi, badina Iehova ese Sisera be hahine ta ena imana dekenai do ia atoa.’ Bona unai bamona ia vara.

Baraki be Taboro Ororona amo ia diho Sisera ena tuari taudia ia hedavari henidia totona. Vadaeni Iehova ese abata ia siaia, bona Sisera ena tuari taudia momo herea be idia maloa mase. To Sisera be ena kariota amo ia diho bona ia heau siri.

Nega sisina murinai Sisera be Iaele ena palai dekenai ia mai. Iaele ese ia boiria vareai bona milika sisina ia henia. Ia inua neganai ena matana idia mahuta, bona ia mahuta boio. Bena Iaele ese palai ena ikoko ta ia abia bona unai tau dikana ena kwarana dekenai ia kokoa. Gabeai, Baraki ia mai neganai, Iaele ese Sisera ena mase tauanina ia hahedinaraia! Debora ena hereva be ia momokani.

Dokonai, King Iabina danu idia alaia mase, bona Israela taudia be nega sisina lalonai maino ai idia noho lou.