OI LALOA au dekenai ia noho gaigaina be gaigai korikorina, a? Ia be gaigai korikorina lasi. Inai gaigai be kopa amo idia karaia. Iehova ese Mose ia hamaoroa unai gaigai be au dekenai ia atoa, unai amo taunimanima ese idia itaia diba bona do idia mauri. To tano ai idia noho gaigai be gaigai korikoridia. Unai gaigai ese taunimanima idia koridia bona idia hagoreredia. Ena badina oi diba, a?

Badina Israela taudia ese Dirava bona Mose idia gwauraia dika. Idia maumau: ‘Dahaka dainai Aigupito amo ai oi hakaua mai, inai taunimanima noho lasi tanona dekenai ai mase totona? Iniseniai aniani eiava ranu be lasi. Bona mana dekenai ai hesiku vadaeni.’

To mana be aniani namona. Hoa karana ta amo Dirava ese idia dekenai ia henia. Bona hoa karana ta amo idia dekenai ranu ia henia danu. To unai taudia be Dirava ese ia naria dalana dainai Ia idia tanikiu henia lasi. Unai dainai Israela taudia panisia totona Iehova ese koria gaigai ia siaia. Gaigai ese idia ia koria bona idia momo idia mase.

Gabeai, Mose dekenai idia mai bona idia gwau: ‘Ai be ai kara dika vadaeni, badina Iehova bona oi ai gwauraia dika. Vadaeni, Iehova do oi noia inai gaigai ia kokia totona.’

Unai dainai Mose be idia totona ia guriguri. Bona Iehova ese Mose ia hamaoroa inai kopa gaigaina ia karaia totona. Ia hamaoroa au ta dekenai do ia atoa, bona gaigai ese ia koria tauna be unai kopa gaigaina ia itaia be namo. Mose be Dirava ia hereva hegeregerena ia karaia. Bona gaigai ese idia koria taudia ese kopa gaigaina idia itaia neganai idia namo lou.

Unai amo gau ta ita dibaia. Ita ibounai be unai gaigai ese idia koria Israela taudia bamona. Ita ibounai be mase dalana dekenai ita noho. Mani oi itaia, taunimanima idia buruka, idia gorere bona idia mase noho. Badina tau bona hahine ginigunana, Adamu bona Heva, ese Iehova idia rakatania, bona ita ibounai be edia natudia. To Iehova ese dala ia karaia unai amo ita mauri hanaihanai diba.

Iehova ese ena Natuna, Iesu Keriso, be tanobada dekenai ia siaia. Iesu be au dekenai idia tauadae, badina taunimanima momo idia laloa ia kara dika. To Iehova ese Iesu ia henia ita ia hamauria totona. Bema ia ita itaia bona ena murinai ita raka, mauri hanaihanai do ita abia. To gabeai unai dala do ita dibaia.