DAHAKA dainai Ieriko ena magu ia moru noho? Toana be bomu ta ia pou bamona. To unai negadiai bomu be lasi; ipidi danu be lasi. Unai be Iehova ena hoa karana ma ta! Ia vara dalana mani ita itaia.

Iehova ena hereva Iosua dekenai mani ita kamonai: ‘Oi bona oiemu tuari taudia be hanua do umui raka hagegea. Dina tamona dekenai nega tamona umui raka hagegea ela bona dina 6. Taravatu Mauana umui huaia. Hahelaga taudia 7 be vairanai do idia raka bona edia kibi idia hiriria.

‘Dina namba 7 dekenai, hanua umui raka hagegea nega 7. Bena kibi umui hiriria daudau bona taunimanima ibounai do idia boiboi bada herea. Bona magu be do ia moru!’

Iosua bona ena taunimanima ese Iehova ena ura idia karaia. Idia raka lalonai, ibounai idia regerege lasi. Ta ia hereva lasi. Kibi bona aena regena sibona idia kamonai. Ieriko lalonai, Dirava ena taunimanima idia inai henia taudia be reana idia gari. Unai uindo dekenai ia noho varo kakakakana oi itaia, a? Unai be daika ena uindo? Oibe, Rahaba ese spai taudia rua edia hereva ia badinaia. Iena ruma bese taudia be ia danu ruma lalonai idia naria noho.

Dokonai, dina namba 7 ai, nega 7 hanua idia raka hagegea murinai, kibi idia hiriria, tuari taudia idia boiboi, bona magu ia moru. Bena Iosua ia gwau: ‘Hanua taudia ibounai umui alaia bona hanua umui gabua. Gau ibounai umui gabua. Siliva, golo, kopa bona auri sibona umui hadikaia lasi, to Iehova ena palai totona umui haboua.’

Iosua be spai taudia rua dekenai ia gwau: ‘Rahaba ena ruma ai umui vareai. Ia bona ena ruma bese umui hakaua mai.’ Rahaba bona ena ruma bese idia roho mauri, spai taudia idia hereva bamona.