NEGA ta oi gwauhamata to gabeai oi davaria oi hamomokania be auka, a? Inai laulau dekenai ia noho tauna be unai bamona ia karaia, bona unai dainai ia lalohisihisi. Ia be Israela ena gari lasi hahemaoro tauna ta, ena ladana be Iepeta.

Iepeta ena nega ai, Israela taudia ese Iehova idia tomadiho henia lasi. Idia kara dika lou. Unai dainai Amono taudia ese idia hahisia neganai Iehova ese ia koua lasi. Bena Iehova dekenai idia boiboi: ‘Ai kara dika vadaeni. Mani emu kara, ai oi hamauria!’

Idia karaia kara dika dainai idia sori. Iehova idia tomadiho henia lou karana amo edia sori toana idia hahedinaraia. Bona Iehova ese ia durudia lou.

Israela taudia ese Iepeta idia abia hidi Amono taudia dikadia ia tuari henia totona. Iepeta ia ura dikadika Iehova ese tuari lalonai ia durua. Unai dainai Iehova dekenai ia gwauhamata: ‘Bema lau oi durua bona Amono taudia dekenai lau kwalimu, vadaeni, lau giroa neganai egu ruma murimurinai ia mai tauna ginigunana be oi dekenai do lau henia.’

Iehova ese Iepeta ena gwauhamata ia abia dae, bona ia durua ia kwalimu totona. Iepeta be ruma dekenai ia giroa neganai, ia hedavari henia totona ia mai tauna ginigunana oi diba, a? Iena natuna kekeni, iena natuna tamona unai. Iepeta ia boiboi mai taitai ida ia gwau: ‘Egu natuna! Madi! Egu lalona oi hahisia bada noho. To Iehova dekenai lau gwauhamata vadaeni, ma hari lau haidaua diba lasi.’

Iepeta ena natuna be gwauhamata ena anina ia diba neganai, ia danu ia lalohisihisi. Badina ena tamana bona ena turadia do ia rakatanidia. To Silo ai, Iehova ena palai dubuna dekenai, ena mauri dinadia ibounai lalonai Iehova ena hesiai gaukara do ia karaia. Unai dainai ena tamana ia hamaoroa: ‘Bema Iehova dekenai oi gwauhamata, namona be oi hamomokania.’

Unai dainai Iepeta ena natuna kekeni be Silo dekenai ia lao, bona ena mauri dinadia ibounai palai dubuna lalonai Iehova ia hesiai henia. Lagani ta ta ibounai lalonai dina foa Israela hahine ese ia idia vadivadi henia, bona idia moale hebou. Taunimanima ese Iepeta ena natuna idia lalokau henia, badina ia be Iehova ena hesiai kekeni namona.