INAI tatau be mai edia hekwakwanai. Idia heau be namo, bema lasi do idia mase. Idia be Israela spai taudia, bona idia ia durua hahine be Rahaba. Rahaba be Ieriko ena magu ataiai ia noho rumana ai ia noho. To hari inai tatau edia hekwakwanai ena badina mani ita tahua.

Israela taudia idia hegaegae Ioridane Sinavaina idia hanaia bona Kanana tano dekenai idia vareai totona. To unai idia do karaia lasi neganai, Iosua ese spai taudia rua ia siaidia. Idia ia hamaoroa: ‘Umui lao. Tano bona Ieriko hanua umui itaia namonamo.’

Spai taudia be Ieriko ai idia vareai neganai, Rahaba ena ruma dekenai idia lao. To tau ta ese Ieriko ena king ia hamaoroa: ‘Israela taudia rua be hari hanuaboi idia mai vadaeni, inai tano itaia totona.’ King be unai ia kamonai neganai, Rahaba dekenai tatau haida ia siaia, bona ia idia hamaoroa: ‘Oiemu ruma dekenai idia daekau tatau oi hakaudia mai murimuri dekenai!’ To Rahaba ese spai taudia be ena guhi dekenai ia hunidia. Unai dainai, ia gwau: ‘Tatau haida be lauegu ruma dekenai idia mai, to edeseni amo idia mai be lau diba lasi. Dina ia diho neganai, iduara idia koua lasi neganai, idia lao. Bema umui haraga, do umui abidia!’ Unai dainai idia murinai idia lao.

Gabu idia rakatania neganai, Rahaba be guhi dekenai ia daekau haraga. Spai taudia ia hamaoroa, ‘Lau diba Iehova ese inai tano umui dekenai do ia henia. Aigupito umui rakatania neganai, Iehova ese Davara Kakakakana ia hapararaia bona king Sihona bona Oga umui alaia sivaraina ai kamonai. Umui lau hebogahisi henia dainai, lau dekenai umui hebogahisi danu. Egu tamana, sinana, tadikaka bona taihudia umui hamauria.’

Spai taudia idia gwauhamata unai do idia karaia, to Rahaba be gau ta ia karaia be namo. Spai taudia idia gwau: ‘Inai varo kakakakana oi abia bona emu uindo dekenai oi kwatua, bona oiemu ruma dekenai emu varavara oi haboudia. Ieriko abia totona ai giroa neganai, emu uindo dekenai inai varo do ai itaia bona emu ruma ai ia noho tauna ta do ai alaia lasi.’ Spai taudia be Iosua dekenai idia giroa bona unai sivarai idia gwauraia.