BAIBEL lalonai buka ta ladana Ruta do oi davaria. Ia be Israela ena hahemaoro taudia edia negai ia noho ruma bese ta ena sivarai. Ruta be Moaba tanona ena hahine matamatana ta; ia be Israela hahinena ta lasi. To Ruta be Dirava momokanina Iehova ia dibaia neganai, ia lalokau henia bada. Naomi be hahine burukana ta, ia ese Ruta ia durua Iehova ia dibaia totona.

Naomi be Israela hahinena. Israela dekenai aniani be bada lasi neganai, ia bona ena tau bona ena memero rua be Moaba dekenai idia lao. Bena dina ta Naomi ena tau ia mase. Gabeai Naomi ena memero rua ese Moaba kekeni rua idia adavaia, edia ladadia be Ruta bona Oropa. To lagani 10 bamona murinai, Naomi ena memero rua idia mase. Naomi bona unai hahine rua idia lalohisihisi bada! Naomi be hari dahaka do ia karaia?

Dina ta Naomi ese ena lalona ia hadaia ena taunimanima dekenai do ia giroa. Ruta bona Oropa idia ura ia danu idia noho, unai dainai ia danu idia lao. To dala dekenai idia raka noho lalonai, Naomi be kekeni rua dekenai ia giroa bona ia gwau: ‘Umui giroa bona emui sinadia danu umui noho.’

Naomi ese ia kisi henidia. Unai neganai idia tai matamaia, badina Naomi idia lalokau henia bada. Idia gwau: ‘Lasi! Oi danu emu taunimanima dekenai do ai lao.’ To Naomi ia haere: ‘Egu natudia e, umui giroa. Emui gabu dekenai umui noho be namo.’ Vadaeni, Oropa ia toreisi bona ena gabu dekenai ia giroa lao. To Ruta ia giroa lasi.

Naomi be ia dekenai ia giroa bona ia gwau: ‘Oropa ia lao vadaeni. Ia danu do oi giroa lou.’ To Ruta ia haere: ‘Lau oi doria lasi oi lau rakatania totona! Namona be oi danu lau lao. Oi lao gabuna be lau danu do lau lao, bona oi noho gabuna dekenai danu do lau noho. Oiemu taunimanima be lauegu taunimanima ai do idia lao, bona oiemu Dirava be lauegu Dirava ai do ia lao. Oi mase gabuna dekenai be lau danu do lau mase, unai gabu dekenai lau do idia guria.’ Ruta be unai ia hereva neganai, Naomi ia hereva lou lasi.

Gabeai Israela dekenai idia ginidae. Unuseniai idia noho. Maoromaoro Ruta be uma dekenai ia gaukara matamaia, badina unai be bali haboua negana. Tau ta ladana Boasi ese Ruta dekenai maoro ia henia ena uma dekenai bali ia gogoa totona. Boasi ena sinana oi diba, a? Ia be Rahaba, Ieriko hanua hahinena.

Dina ta Boasi ese Ruta ia hamaoroa: ‘Oiemu sivarai lau kamonai vadaeni. Naomi dekenai oi hebogahisi bada. Emu tamana bona sinana bona emu gabu korikori oi rakatania, bona oi diba lasi taudia dekenai oi mai bona oi noho sivaraina lau diba. Iehova ese oi ia hanamoa be namo!’

Ruta ia hereva: ‘Oi be lau dekenai oi hebogahisi. Lau moale badina lau dekenai oi hereva namonamo.’ Boasi ese Ruta ia ura henia bada, bona daudau lasi murinai idia headava. Unai ese Naomi ia hamoalea bada! To Ruta bona Boasi ese edia natuna ginigunana, ladana Obeda, idia havaraia neganai, ena moale ia bada herea. Gabeai Obeda be Davida ena tubuna ai ia lao, bona ena sivarai be gabeai do ita herevalaia.