TANOBADA ena goada taudia ibounai edia goada ia hanaia tauna ena ladana oi diba, a? Ia be hahemaoro tauna Samson. Iehova ese Samson dekenai unai goada ia henia. Samson ia do vara lasi neganai, Iehova ese ena sinana ia hamaoroa: ‘Kahirakahira natuna ta do oi havaraia. Ia ese Pilistia taudia amo Israela do ia hamauria!’

Pilistia taudia be Kanana dekenai idia noho taunimanima dikadia. Edia tuari taudia be momo, bona Israela taudia idia hahisidia momokani. Nega ta, Samson be Pilistia taudia edia gabu dekenai ia lao neganai, laiona badana ta be mai boiboi bada danu ia heau mai. To Samson ese ena imana kavakava amo unai laiona ia alaia. Pilistia taudia handred momo ia alaia danu.

Gabeai Samson ese hahine ta ladana Delila ia ura henia. Pilistia lohia taudia be Delila dekenai idia gwauhamata, bema Samson ena goada ena badina ia gwauraia hedinarai, idia ta ta ese ia dekenai siliva moni 1,100 do idia henia. Delila be unai moni ia ura henia. Ia be Samson eiava Dirava ena taunimanima edia turana korikorina lasi. Unai dainai ia henanadai momo Samson ena goada ena badina ia dibaia totona.

Gabeai, Delila ese Samson ena lalona ia ania bena ena goada ena badina ia gwauraia. Ia gwau: ‘Egu huina be nega ta idia utua lasi. Egu vara negana amo Dirava ese lau ia abia hidi, Nasiri tauna ta, eiava hesiai tauna ta ai lau lao totona. Bema egu huina idia utua, egu goada do ia ore.’

Vadaeni, Delila be unai ia dibaia neganai, Samson ena kwarana be ena mamuna dekenai ia atoa bona Samson ia mahuta. Bena tau ta ia boiria bona Samson ena huina ia utua. Samson ia noga neganai, ena goada ia ore. Bena Pilistia taudia idia mai bona ia idia dogoatao. Ena matana rua idia kokia, bona edia hesiai tauna ai idia halaoa.

Dina ta Pilistia taudia be pati bada herea idia karaia edia dirava Dagona tomadiho henia totona, bona dibura ruma amo Samson idia hakaua mai idia kirikirilaia totona. Samson ena huina be ia tubu lou vadaeni. Samson be ena hakaua merona dekenai ia gwau: ‘Lau ura ruma ena du lau daua toho.’ Bena Samson be goada totona Iehova ia noia, bona ruma ena du ia dogoatao. Ia boiboi: ‘Pilistia taudia danu do lau mase.’ Unai pati dekenai Pilistia taudia 3,000 idia noho, bona Samson be du ia doridia neganai ruma ia moru bona inai kara dika taudia ibounai ia hamasea.