IOSUA oi itaia. Ia hereva noho: ‘Dina, oi diho lasi!’ Bona dina be ia diho lasi. Dina tamona lalonai guba huanai ia noho. Iehova ena siahu dainai ia diho lasi! To Iosua ia ura dina ena diari ia hedinarai noho ena badina mani ita itaia.

Kanana ena king dikadia 5 ese Gibeona taudia idia tuari henia hamatamaia neganai, Gibeona taudia ese tau ta Iosua dekenai idia siaia heduru abia totona. Ia gwau: ‘Mai haraga! Mani ai oi hamauria! Ororo kahanai idia noho king ibounai idia mai emu hesiai taudia idia tuari henia totona.’

Maoromaoro Iosua bona ena tuari taudia idia lao. Hanuaboi ibounai idia raka. Gibeona dekenai idia ginidae neganai, unai king 5 edia tuari taudia idia gari bona idia heau. Bena Iehova ese aisi nadi badadia guba amo ia siaia, bona unai amo idia mase taudia edia namba be Iosua ena tuari taudia ese idia hamasea taudia edia namba ia hanaia.

Iosua ia itaia kahirakahira dina do ia diho. Gabu do ia dibura, bona king dikadia 5 edia tuari taudia momo do idia heau mauri. Unai dainai, Iosua ese Iehova ia noinoi henia bona ia gwau: ‘Dina, oi diho lasi!’ Bona dina ena diari ia hedinarai noho neganai, Israela taudia be tuari dekenai idia kwalimu.

Kanana dekenai Dirava ena taunimanima idia inai henia king dikadia be momo. Iosua bona ena tuari taudia be lagani 6 lalonai unai tano ena king 31 idia halusidia. Unai murinai, Iosua ese Kanana tanona ia haria, bona Israela lalonai tano idia do abia lasi iduhu dekenai ia henidia.

Lagani momo idia ore, bena Iosua ena mauri lagani be 110 neganai ia mase. Ia bona ena turadia idia mauri noho neganai, taunimanima ese Iehova idia kamonai henia. To unai tatau namodia idia mase neganai, taunimanima be kara dikadia idia karaia matamaia bona hekwakwanai idia davaria. Dirava ese ia durudia be namo.