AIGUPITO idia rakatania bona hua rua bamona murinai, Israela taudia be Sinai Ororona, eiava Horeb Ororona, dekenai idia ginidae. Iehova ese Mose be unai gabu dekenai ia hereva henia, ia araia auna amo. Taunimanima be nega sisina unuseniai idia noho.

Taunimanima be henunai idia naria noho lalonai Mose be ororo dekenai ia daekau. Ororo ataiai, Iehova ese Mose ia hamaoroa Ia ura Israela taudia ese Ia idia kamonai henia bona Ena taunimanima ai idia lao. Mose ia diho neganai, Iehova ena hereva be Israela taudia dekenai ia gwauraia. Bona idia gwau Iehova do idia kamonai henia, badina idia ura ena taunimanima ai idia lao.

Murinai Iehova ese hoa karana ta ia karaia. Ororo ataiai amo kwalahu ia siaia daekau bona guba ia regerege bada. Taunimanima ia hereva henidia danu, ia gwau: ‘Lau be Iehova emui Dirava, Aigupito amo umui lau hakaua mai.’ Bena ia haganidia: ‘Lau sibona umui tomadiho henia, ma dirava ta lasi.’

Bena Dirava ese Israela taudia dekenai ma taravatu nain ia henia. To taunimanima be idia gari bada. Mose idia hamaoroa: ‘Oi hereva ai dekenai badina ai gari. Bema Dirava ia hereva ai dekenai, reana do ai mase.’

Gabeai Iehova ese Mose ia hamaoroa: ‘Ororo ataiai oi daekau mai. Oi dekenai nadi palaka rua do lau henia. Unai nadi latanai egu taravatu lau torea. Lau ura taunimanima ese do idia badinaia.’ Bena Mose be ororo dekenai ia daekau lou. Dina 40 bona hanuaboi 40 unuseniai ia noho.

Dirava ese taravatu momo herea ena taunimanima dekenai ia henia. Mose ese unai taravatu ia toredia. Dirava ese Mose dekenai nadi palaka rua ia henia danu. Inai nadi dekenai, Dirava sibona ese ena taunimanima dekenai ia gwauraia Taravatu Ten ia torea.

Unai Taravatu Ten be mai anina bada taravatudia. To Dirava ese Israela taudia dekenai ia henia taravatu ma haida be mai anina bada danu. Unai taravatu ta be inai: ‘Iehova oiemu Dirava do oi lalokau henia mai emu kudouna ibounai, mai emu lalona ibounai mai emu souli ibounai bona mai emu goada ibounai danu.’ Bona ma ta be inai: ‘Emui dekena tauna oi lalokau henia, oi sibona oi lalokau henia bamona.’ Dirava ena Natuna, Iesu Keriso ia gwau unai taravatu rua be Iehova ese Israela taudia dekenai ia henia taravatu ibounai idia hanaia. Gabeai Dirava ena Natuna bona ena hadibaia herevadia do ita dibaia.