DAVIDA be Ierusalema ai ia lohia matamaia murinai, Iehova ese ena tuari oreana ia durua dainai edia inai taudia amo idia kwalimu. Iehova ia gwauhamata Israela taudia dekenai Kanana tanona do ia henia. Bona Iehova ena heduru amo ia gwauhamatalaia tano ibounai idia abia.

Davida be lohia tauna namona. Iehova ia lalokau henia. Unai dainai Ierusalema ia abia murinai, ia karaia kara ginigunana be Iehova ena Taravatu Mauana be unuseniai ia abia lao. Bona ia ura dubu ta ia karaia unai amo Taravatu Mauana be lalonai do ia atoa.

Davida ena lagani ia bada neganai, kerere bada hereana ta ia karaia. Davida ia diba ma tau ta ena gau ia abia be kerere. To adorahi ta, ena ruma ena guhi ai ia gini neganai, ena matana ia negea diho bona hahine hairaina ta ia itaia. Ena ladana be Bataseba bona ena tau be Davida ena tuari tauna ta ladana Uria.

Davida be Bataseba ia ura henia dikadika dainai, haida ia siaia ena ruma dekenai idia hakaua mai totona. Ena tau be tuari gabuna dekenai. Vadaeni, Davida be Bataseba ida idia mahuta hebou bona gabeai Bataseba ia davaria ia be natuna ta do ia havaraia. Davida ia laloa momo bona ena tuari biaguna Ioaba dekenai hereva ia siaia, ia ura Uria be tuari taudia edia vairanai ia atoa, unai amo do idia hamasea. Uria ia mase neganai, Davida be Bataseba ia adavaia.

Iehova be Davida dekenai ia badu momokani. Unai dainai ena hesiai tauna Natana ia siaia Davida ena kara dika ia hadibaia totona. Laulau dekenai Natana oi itaia diba Davida ia hereva henia noho. Davida be ia karaia karana dainai ia sori bada, unai dainai Iehova ese ia hamasea lasi. To Iehova ia gwau: ‘Oi kara dika dainai, emu ruma dekenai hekwakwanai momo do idia vara.’ Bona unai be momokani!

Matamanai, Bataseba ena natuna ia mase. Bena Davida ena natuna ginigunana Aminona ia itaia ena taihuna Tamara be sibona ia noho neganai, ia abia bona ia sihari henia. Davida ena natuna Abesaloma ia diba neganai, ia badu bada dainai Aminona ia alaia mase. Gabeai, Abesaloma ese momo edia lalona ia veria, bona sibona king ai ia halaoa. Dokonai, tuari dekenai Davida ia kwalimu, to Abesaloma ia mase. Oibe, Davida ena ruma ai hekwakwanai momo idia vara.

Unai ibounai idia vara noho lalonai, Bataseba ese mero ta ladana Solomona ia havaraia. Davida ia buruka bona ia gorere neganai, ena natuna Adonaisa be sibona king ai ia halaoa toho. Unai dainai Davida ese hahelaga tauna Sadoka ia hamaoroa oela be Solomona ena kwarana latanai ia bubua, unai amo ia hahedinaraia Solomona be king ai do ia lao. Daudau lasi murinai Davida ena mauri lagani be 70 neganai ia mase. Ia be lagani 40 ia lohia, to hari Solomona be Israela ena king.