IA VARA gauna oi itaia diba, a? Inai mero ese inai mamoe natuna maragina be bea amo ia hamauria. Bea ia mai, mamoe ia abia bona ia ania gwauraia. To mero be bea murinai ia heau bona mamoe be bea ena uduna amo ia hamauria. Bona bea ese ia heatu henia gwauraia neganai, mero ese ia dogoatao bona ia alaia mase! Ma nega ta ai mamoe ta be laiona ta amo ia hamauria. Momokani, ia be gari lasi merona, ani? Ena ladana oi diba, a?

Unai be mero matamata Davida. Ia be Betelehema hanua dekenai ia noho. Iena tubuna be Obeda, Ruta bona Boasi edia natuna. Idia oi laloatao, a? Bona Davida ena tamana be Iese. Davida ese ena tamana ena mamoe ia naridia. Iehova ese Saulo ia abia hidi king ai ia lao, bena lagani 10 murinai Davida ia vara.

Vadaeni, nega ta Iehova ese Samuela ia hamaoroa: ‘Oela namo herea oi abia bona Iese ena ruma, Betelehema dekenai oi lao. Ena natuna ta lau abia hidi king ai ia lao totona.’ Samuela ese Iese ena natuna ginigunana Eliaba ia itaia neganai, sibona dekenai ia gwau: ‘Iehova ese ia abia hidi tauna be inai.’ To Iehova ese Samuela ia hamaoroa: ‘Ena lata bona ena hairai oi laloa lasi. Lau be ia lau abia hidi lasi king ai ia lao totona.’

Unai dainai Iese ese ena natuna Abinadaba ia boiria bona Samuela dekenai ia hakaua mai. To Samuela ia gwau: ‘Lasi, ia danu Iehova ese ia abia hidi lasi.’ Murinai, Iese ese ena natuna Sama ia hakaua mai. Samuela ia gwau: ‘Lasi, ia danu Iehova ese ia abia hidi lasi.’ Iese ese Samuela dekenai ena natudia 7 ia hakaudia mai, to Iehova ese idia ta ia abia hidi lasi. Samuela ia henanadai: ‘Oiemu natudia memero be inai sibona, a?’

Iese ia gwau: ‘Maragina ia noho, to ia be mamoe ia naria noho.’ Davida ia hakaua mai neganai, Samuela ia itaia diba ia be mero hairaina. Iehova ia gwau: ‘Merona inai. Oela ia dekenai oi bubua.’ Bona Samuela be unai bamona ia karaia. Gabeai, Davida be Israela edia king ai do ia lao.