INAI paradaiso laulauna be Dirava ese Isaia dekenai ia hahedinaraia gauna bamona. Iona ia noho bena nega sisina murinai Isaia ia vara.

Paradaiso anina be “uma” eiava “loaloa gabuna.” Inai laulau oi itaia neganai, inai buka ai Dirava ese Adamu bona Heva totona ia karaia uma hairaina oi laloatao, ani? To tanobada ibounai be paradaiso ai do ia lao, a?

Iehova ese Isaia ia hamaoroa Ena taunimanima totona do ia karaia paradaiso matamatana ena sivarai ia torea. Ia gwau: ‘Uda sisia bona mamoe be maino ai do idia noho hebou. Boromakau natudia bona laiona maragidia do idia aniani hebou bona natudia maragidia ese do idia naridia. Ena be natudia maragidia be gaigai mai edia poisini kahirakahira idia gadara to do ia koria lasi.’

Haida do idia gwau: ‘Unai bamona ia vara diba lasi. Matamana negana amo ema bona hari tanobada ai hekwakwanai momo idia vara, bona do ia noho hanaihanai.’ To mani oi laloa: Dirava ese Adamu bona Heva dekenai edena bamona noho gabuna ia henia?

Dirava ese idia be paradaiso lalonai ia atodia. Dirava ena hereva idia kamonai lasi dainai, edia noho gabu hairaina idia haboioa, idia buruka bena idia mase. Dirava ia gwauhamata ia idia lalokau henia taudia dekenai Adamu bona Heva ese idia haboioa gaudia do ia henia.

Paradaiso ai gau ta ese ma gau ta do ia hadikaia lasi. Matamana negana amo Dirava ena ura be maino momokani do ia noho. Taunimanima ibounai do idia gorere lasi bona do idia moale. To gabeai Dirava ese unai do ia havaraia dalana do ita dibaia.