KING Nebukanesa ese Israela ena sikuli namonamo taudia be Babulonia dekenai ia abia lao negana amo lagani 10 idia ore vadaeni. Bona hari ia vara noho gauna mani oi itaia! Ierusalema be lahi ese ia gabua noho. Bona idia mase lasi Israela taudia be Babulonia dekenai idia abia lao dibura taudia bamona.

Laloaboio lasi, Iehova ena peroveta taudia idia gwau bema Israela taudia ese edia kara idia haidaua lasi, unai bamona do ia vara. To Israela taudia be peroveta taudia idia kamonai henia lasi. Dirava koikoidia idia tomadiho henia noho, to Iehova idia tomadiho henia lasi. Unai dainai davana idia abia be maoro. Unai ita diba badina peroveta tauna Esekiela ese Israela taudia edia kara dikadia ia herevalaia.

Esekiela oi diba, a? Ia be lagani 10 mai kahana gunanai, Ierusalema idia do hadikaia lasi neganai, Nebukanesa ese Babulonia dekenai ia abia lao mero matamatana ta. Unai nega tamona ai Daniela bona ena turadia toi, Sataraka, Misaka, bona Abetenigo be Babulonia dekenai idia abia lao danu.

Esekiela be Babulonia dekenai ia do noho lalonai, Iehova ese Ierusalema ena dubu dekenai idia vara kara dikadia ia hahedinaraia. Hoa karana ta amo unai ia karaia. Esekiela be momokani Babulonia dekenai ia noho, to Iehova ena siahu amo dubu dekenai idia vara gaudia ibounai ia itaia. Bona Esekiela ia itaia gaudia be dika herea!

Iehova ese Esekiela ia hamaoroa: ‘Dubu ai, taunimanima ese idia karaia kara dikadia mani oi itaia. Haba dekenai gaigai bona animal haida edia laulau idia torea. Bona Israela taudia oi itaia, idia tomadiho henidia!’ Esekiela ese unai gaudia ia itaia diba bona idia vara gaudia ia torea.

Iehova ese Esekiela ia nanadaia: ‘Israela ena hakaua taudia be hehuni dekenai idia karaia gaudia oi itaia, a?’ Oibe, unai gaudia danu ia itaia diba. Tatau 70 idia noho, bona idia ibounai be dirava koikoidia idia tomadiho henia. Idia gwau noho: ‘Iehova ese ita ia itaia lasi. Ia ese tano ia rakatania vadaeni.’

Bena Iehova ese Esekiela dekenai dubu ena not kahanai ia noho geiti ai idia helai hahine haida ia hahedinaraia. Idia be unuseniai idia helai dirava koikoi Tamusu idia tomadiho henia noho. Bona dubu vairanai idia gini noho tatau mani oi itadia! Idia be tatau 25 bamona. Esekiela be idia ia itaia. Idia be ist kahana dekenai idia tui diho bona dina idia tomadiho henia!

Iehova ia gwau: ‘Inai taudia ese lau idia matauraia lasi. Kara dika idia karaia. To unai sibona lasi, lauegu dubu dekenai idia karaia!’ Unai dainai Iehova ia gwauhamata: ‘Egu badu ena siahu do idia mamia. Bona idia mase ore neganai idia do lau hebogahisi henia lasi.’

Iehova ese inai gaudia Esekiela dekenai ia hahedinaraia bena lagani toi murinai, Israela taudia ese Nebukanesa idia gwau-edeede henia. Unai dainai, idia ia tuari henia. Lagani ta bona hua 6 murinai, Babulonia taudia ese Ierusalema ena magu idia hamakohia bona hanua idia gabua ore. Taunimanima momo idia hamasedia, eiava dibura taudia bamona Babulonia dekenai idia abidia lao.

Dahaka dainai Israela taudia dekenai inai nega dikana ia vara neganai, Iehova ese ia koua lasi? Oibe, badina Iehova idia kamonai henia lasi bona ena taravatu idia badinaia lasi. Unai ese ia hahedinaraia nega ibounai Iehova ia gwauraia gaudia ita karaia be gau badana.

Matamanai Nebukanesa ese Israela taudia haida dekenai maoro ia henia edia tano dekenai idia noho totona. King Nebukanesa ese Iuda tauna ta ladana Gedalaia ia abia hidi idia ia naria totona. To gabeai Israela taudia haida ese Gedalaia idia alaia mase. Vadaeni, unai kara dikana ia vara dainai taunimanima idia gari, idia laloa Babulonia taudia do idia mai bona idia ibounai do idia hadikaia ore. Unai dainai Ieremia idia abia bona Aigupito dekenai idia heau lao.

Unai neganai Israela tano dekenai taunimanima ta ia noho lasi. Lagani 70 lalonai ta be unuseniai ia noho lasi. Tano be ia noho kava. To Iehova ia gwauhamata lagani 70 murinai ena taunimanima do ia abidia giroa. To unai nega idia do naria noho lalonai, Dirava ena taunimanima Babulonia dekenai be edena bamona? Mani ita itaia.