IOSAIA be Israela ena saut kahana iduhu rua edia king ai ia lao neganai, ena mauri lagani be 8 sibona. Ia be mero matamata momokani king ai ia lao totona. Unai dainai, matamanai taunimanima badadia haida ese ia idia durua edia bese ia lohiaia totona.

Iosaia be lagani 7 ia lohia neganai, Iehova ia tahua matamaia. King namodia hegeregere Davida, Iehosapata bona Hesekaia edia haheitalai ia badinaia. Bena, lagani 20 ia do abia lasi neganai, Iosaia ese gari lasi karana ta ia karaia.

Nega daudau lalonai Israela taudia edia kara be dika momokani. Dirava koikoidia idia tomadiho henia. Kaivakuku vairanai idia tui diho. Unai dainai Iosaia be ena tatau danu ia lao, bona tano amo tomadiho koikoidia ia kokia matamaia. Unai be gaukara bada herea, badina taunimanima momo ese dirava koikoidia idia tomadiho henia. Inai laulau dekenai oi itaia diba Iosaia bona ena tatau ese kaivakuku idia hamakohia noho.

Gabeai, Iosaia ese tatau toi ia abia hidi Iehova ena dubu hanamoa gaukarana idia naria totona. Taunimanima amo moni idia gogoa bona inai tatau dekenai idia henia edia gaukara davana karaia totona. Dubu ena gaukara idia karaia noho lalonai, hahelaga tauna badana Hilekaia, ese unuseniai mai anina bada gauna ta ia davaria. Inai be idaunegai momokani Iehova ese Mose ia hamaoroa ia torea taravatu bukana unai. Lagani momo ia boio.

Unai buka be Iosaia dekenai idia abia lao, bona ta ia hamaoroa ia dekenai unai buka ia duahia totona. Ia kamonai noho lalonai, Iosaia ia itaia diba taunimanima be Iehova ena taravatu idia badinaia lasi. Unai dainai ia lalohisihisi bada bona ena dabua ia darea, laulau dekenai oi itaia bamona. Ia gwau: ‘Iehova be ita dekenai ia badu badina iseda tamadia ese inai buka ena taravatu idia badinaia lasi.’

Iosaia ese hahelaga tauna badana Hilekaia ia hamaoroa namona be ia tahua Iehova be idia dekenai dahaka do ia karaia. Hilekaia be peroveta hahine Hulida dekenai ia lao bona ia nanadaia. Hulida be Iosaia totona Iehova ese ia gwauraia herevana be Hilekaia dekenai ia gwauraia: ‘Ierusalema bona ena taunimanima be edia dika davana do idia abia badina dirava koikoidia idia tomadiho henia bona tano be kara dika amo ia honu. To oi, Iosaia, oi kara namo dainai, davana do lau henia lasi ela bona oi mase murinai.’