BEMA oi mase, to gabeai oi toreisi lou, oi laloa emu sinana ena hemami be edena bamona? Do ia moale momokani! To ia mase vadaeni tauna be ia mauri lou diba, a? Idaunegai unai bamona ia vara, a?

Inai tau, hahine bona mero maragina mani oi itaia. Inai tau be peroveta tauna Elia. Inai hahine be Sarepata hanua ena vabu ta, bona mero be iena natuna. Vadaeni, dina ta inai mero ia gorere. Ena gorere ia bada ia lao ela bona ia mase. Bena Elia ese hahine ia hamaoroa: ‘Mani lau dekenai mero oi henia.’

Elia ese mase merona be atai daiutuna dekenai ia abia daekau bona bedi latanai ia hahekurea. Bena ia guriguri: ‘Iehova e, mani mero oi hamauria lou.’ Bena mero ia hahodi matamaia! Vadaeni, Elia ese ia abia diho bona hahine dekenai ia gwau: ‘Itaia, emu natuna be ia mauri noho!’ Unai dainai sinana ia moale momokani.

Iehova ena peroveta tauna badana ma ta be Elisaia. Ia be Elia ena durua tauna. To gabeai, Iehova ese Elisaia ia gaukaralaia hoa karadia ia karaia totona. Dina ta Elisaia be Suneme hanuana dekenai ia lao, unuseniai hahine ta ese ia kara namo henia. Gabeai inai hahine ese mero ta ia havaraia.

Daba ta, mero ia bada murinai, ena tamana danu uma dekenai ia gaukara. Daudau lasi mero ia boiboi: ‘Egu kwarana ia hisihisi!’ Ruma dekenai ia abia lao murinai, mero ia mase. Ena sinana ia lalohisihisi bada! Maoromaoro ia lao bona Elisaia ia abia.

Elisaia ia ginidae neganai, mase merona danu daiutu lalonai ia vareai. Iehova dekenai ia guriguri, bona mero ena tauanina latanai ia hekure. Daudau lasi murinai, mero ena tauanina ia siahu bona nega 7 ia asimana. Sinana ia vareai bona ena natuna ia itaia ia mauri lou neganai, ia moale momokani!

Taunimanima momo herea idia mase vadaeni. Unai ese edia ruma bese bona turadia edia lalona ia hahisia bada. Ita be siahu lasi mase taudia ita hatorea isi lou totona. To Iehova be mai ena siahu. Gabeai, taunimanima milioni momo do ia hamauria lou dalana do ita dibaia.