INAI taudia be inai tau matamata idia kirikirilaia noho. Ia oi diba, a? Ia be Ieremia. Ia be Dirava ena peroveta tauna badana ta.

King Iosaia ese kaivakuku be tano amo ia hadikaia ore hamatamaia bena nega sisina murinai, Iehova ese Ieremia ia hamaoroa Ena peroveta tauna ai ia lao totona. To, Ieremia ia laloa ia be mero matamata dainai peroveta gaukara ia karaia diba lasi. To Iehova ese ia hamaoroa ia do ia durua.

Ieremia ese Israela taudia ia hamaoroa edia kara dika do idia hadokoa. Ia gwau: ‘Bese idauidau idia tomadiho henia diravadia be koikoi.’ To Israela taudia momo idia ura kaivakuku idauidau idia tomadiho henia, to idia ura lasi Iehova idia tomadiho henia. Ieremia ese taunimanima ia hamaoroa Dirava ese edia kara dika ena davana do ia henia neganai, idia kiri sibona.

Lagani momo idia ore. Iosaia ia mase, bona hua toi murinai ena natuna Iehoiakimi be king ai ia lao. Ieremia ese taunimanima ia hamaorodia noho: ‘Bema emui kara umui haidaua lasi, Ierusalema do ia ore.’ Hahelaga taudia ese Ieremia idia dogoatao bona idia boiboi: ‘Inai hereva oi gwauraia dainai oi ai alaia mase be namo.’ Bena Israela ena lohia taudia idia hamaoroa: ‘Ieremia ita alaia mase be namo, badina iseda hanua ia gwauraia dika.’

Ieremia be dahaka do ia karaia? Ia gari lasi! Idia ibounai ia hamaoroa: ‘Iehova ese lau ia siaia inai hereva lau gwauraia totona. Bema emui kara dika umui rakatania lasi, Iehova ese Ierusalema do ia hadikaia ore. To inai umui laloa namonamo: Bema lau umui alaia mase, umui ese kerere lasi tauna do umui alaia.’

Lohia taudia ese Ieremia idia alaia lasi, to Israela taudia ese edia kara idia haidaua lasi. Gabeai, Babulonia ena king Nebukanesa ese Ierusalema ia tuari henia. Dokonai Nebukanesa ese Israela taudia be ena hesiai taudia ai ia halaoa. Taunimanima tausen momo be Babulonia dekenai ia abidia lao. Idau taudia ese tano idauna dekenai oi idia hakaua lao ena hemami mani oi laloa!