DAVIDA ia do mase lasi neganai, Dirava amo ia abia palanina Iehova ena dubu haginia gaukara totona be Solomona dekenai ia henia. Ena lohia lagani namba 4 ai, Solomona ese dubu ia haginia matamaia, bona lagani 7 bona hua 6 murinai ia haorea. Taunimanima tausen momo idia gaukara bona dubu haginia totona moni bada herea idia negea. Badina golo bona siliva momo idia gaukaralaia.

Dubu be mai ena daiutu badadia rua, palai dubuna bamona. To edia bada ese palai dubu ena daiutu edia bada be nega rua amo idia hanaia. Solomona ese Taravatu Mauana be dubu ena lalona momokani daiutuna lalonai ia atoa, bona palai dubu ena kohu ma haida be daiutu iharuana lalonai ia atoa.

Dubu idia haginia haorea neganai, idia moale karaia. Solomona be dubu vairanai ia tui diho bona ia guriguri, laulau dekenai oi itaia bamona. Solomona be Iehova dekenai ia gwau, ‘Guba ibounai ena bada be oi totona do ia hegeregere lasi. Unai dainai inai dubu be hegeregere lasi momokani. To, egu Dirava e, emu taunimanima be inai gabu dekenai idia guriguri neganai oi kamonai henidia.’

Solomona ese ena guriguri ia haorea neganai, lahi be guba amo ia diho mai. Idia henia animal boubou gaudia ia araia ore. Bona Iehova amo ia mai diari badana ese dubu ia hahonua. Unai ese ia hahedinaraia Iehova be ia kamonai noho, bona dubu bona Solomona ena guriguri dekenai ia moale. Palai dubuna lasi, to dubu be hari Israela taudia edia tomadiho gabuna ai ia lao.

Nega daudau Solomona be aonega dalanai ia lohia bona taunimanima idia moale. To Solomona be tano idauidau amo Iehova idia tomadiho henia lasi hahine momo ia adavaia. Idia ta oi itaia diba inai kaivakuku ia tomadiho henia noho? Gabeai, Solomona ena adavadia ese ia idia veria dirava ma haida ia tomadiho henia totona. Solomona be unai bamona ia karaia neganai, ia vara gauna oi diba, a? Taunimanima be hebogahisi dalanai ia kara henidia lou lasi. Ia dagedage henidia bona taunimanima be idia moale lasi.

Unai ese Iehova ia habadua, bona Solomona dekenai ia gwau: ‘Basileia be oi dekena amo do lau kokia bona ma tau ta dekenai do lau henia. Emu mauri dinadia lalonai do lau karaia lasi, to emu natuna ena lohia neganai. To basileia ena taunimanima ibounai be emu natuna amo do lau kokia lasi.’ Mani unai ia vara dalana ita itaia.