INAI memero matamata toi edia sivarai oi laloatao, a? Oibe, idia be Daniela ena turadia bona guna idia dekenai ia namo lasi aniani haida idia dadaraia. Babulonia taudia ese idia gwauraidia Sataraka, Misaka bona Abetenigo. To hari idia oi itaia. Dahaka dainai inai kaivakuku badana vairanai idia tui diho lasi, ibounai idia karaia bamona? Mani ita itaia.

Iehova sibona ese ia torea taravatudia, idia gwauraia Taravatu Ten, oi laloatao, a? Taravatu ginigunana be inai: ‘Lau sibona umui tomadiho henia, ma Dirava ta lasi.’ Inai memero matamatadia ese unai taravatu idia badinaia, herevana unai idia karaia be auka.

Babulonia ena king, Nebukanesa, ese tatau badadia momo ia boiria ia hagania kaivakukuna idia tomadiho henia totona. Taunimanima ibounai ia hamaoroa: ‘Kibi, gita bona miusiki gadara gaudia ma haida umui kamonai neganai, umui tui diho bona inai golo kaivakukuna umui tomadiho henia. Ia tui diho bona tomadiho henia lasi tauna be maoromaoro siahu herea lahina lalonai do idia negea.’

Nebukanesa ia kamonai Sataraka, Misaka bona Abetenigo idia tui diho lasi neganai, ia badu momokani. Hereva ia siaia idia be ena vairana dekenai idia hakaua mai totona. Vadaeni, ia hamaorodia lou idia tui diho totona. To inai memero matamatadia ese Iehova idia abidadama henia. Nebukanesa idia hamaoroa: ‘Ai hesiai henia Diravana ese ai do ia hamauria diba. To bema ai ia hamauria lasi, oiemu golo kaivakukuna dekenai do ai tui diho lasi.’

Nebukanesa be unai ia kamonai neganai, ia badu momokani. Lahi siahu hereana ta be kahirakahira bona ia gwau: ‘Lahi ena siahu ma umui habadaia nega 7, guna umui hasiahua bamona lasi!’ Bena ena tuari oreana lalonai idia noho tatau goadadia ia hamaoroa Sataraka, Misaka bona Abetenigo idia kwatua bona lahi lalonai idia negea vareai. Lahi be ia siahu momokani dainai, ena siahu ese unai tatau goadadia ia hamasea. To lahi lalonai idia negea memero matamata toi be edena bamona?

King be lahi lalonai ia itaia, bona ia gari bada. Ia henanadai: ‘Ita ese memero toi ita kwatudia bona lahi siahu herea lalonai ita negea, ani?’

Iena hesiai taudia idia haere: ‘Oibe, toi ita negea.’

Ia gwau: ‘To taunimanima 4 lau itaia, lahi lalonai idia raka loaloa. Varo ese ia guidia lasi bona lahi ese idia ia araia lasi. Bona tau namba 4 be dirava ta bamona.’ King be lahi gabuna ena iduara kahirakahira ia lao bona ia boiboi: ‘Sataraka, Misaka bona Abetenigo e! Atai Momokani Diravana ena hesiai taudia e, umui raka-lasi!’

Idia raka-lasi neganai, taunimanima ibounai ese idia itaia idia be dika ta idia davaria lasi. Bena king ia gwau: ‘Sataraka, Misaka bona Abetenigo edia Dirava ita hanamoa! Ena aneru ia siaia bona idia ia hamauria badina idau diravana ta idia tomadiho henia lasi, to edia Dirava sibona.’

Iehova abidadama henia karana dekenai haheitalai namona idia hahedinaraia ita ese ita badinaia totona, ani?