IDIA karaia noho gaukara ibounai mani oi itaia. Israela taudia be Ierusalema ena magu haginia gaukarana dekenai idia bisi. Lagani 152 gunanai, King Nebukanesa ese Ierusalema ia hadikaia neganai, ia ese magu ia hamakohia bona hanua ena geiti ia gabudia. Israela taudia be Babulonia amo idia giroa neganai, magu idia haginia lou lasi.

Lagani momo edia hanua ena magu be lasi dainai, oi laloa Israela taudia edia hemami be edena bamona? Reana idia gari. Edia inai taudia idia vareai haraga bona idia tuari henidia diba. To hari inai tauna, Nehemia ese ia durudia magu idia haginia lou totona. Nehemia oi diba, a?

Nehemia be Israela tauna ta, bona ia be Morodekai bona Eseta edia noho hanuana Susa amo. Nehemia be king ena ruma ai ia gaukara, unai dainai reana ia be Morodekai bona Eseta edia turana namona ta. To Baibel ia gwau lasi Nehemia be Eseta ena tau, King Ahasuero totona ia gaukara. Ia be Ahasuero murinai ia lohia tauna, King Aratasaseta, totona ia gaukara.

Laloaboio lasi, Aratasaseta be king namona. Ia ese Esera dekenai moni momo ia henia, Ierusalema dekenai Iehova ena dubu ia hanamoa lou totona. To Esera be hanua ena magu ia haginia lou lasi. Nehemia ese unai gaukara ia karaia dalana mani ita itaia.

Aratasaseta ese dubu hanamoa monina be Esera dekenai ia henia bena lagani 13 idia ore vadaeni. Nehemia be king Aratasaseta ena uaina bubua tauna badana. Anina be king dekenai ena uaina ia henia, bona ia naria, tau ta ese hamasea muramurana ia udaia garina. Unai be gaukara badana.

Vadaeni, dina ta Nehemia ena tadikaka Hanani bona tatau haida Israela tano amo idia mai Nehemia idia vadivadi henia totona. Israela taudia ese idia davaria noho hekwakwanai bona Ierusalema ena magu ia dika sivaraina be ia dekenai idia gwauraia. Unai ese Nehemia ena lalona ia hahisia bada, bona Iehova dekenai unai ia gurigurilaia.

Dina ta king ia itaia Nehemia ia lalohisihisi, bona ia nanadaia: ‘Dahaka dainai oi lalohisihisi?’ Nehemia ia gwau, badina Ierusalema bona ena magu ia dika. King ese ia nanadaia lou: ‘Oiemu ura gauna be dahaka?’

Nehemia ia gwau: ‘Lau oi siaia Ierusalema dekenai, bena magu do lau haginia lou.’ King Aratasaseta be hebogahisi tauna. Ia gwau Nehemia ia lao be namo, bona haginia gaukara durua totona au haida ia henia. Daudau lasi Nehemia be Ierusalema dekenai ia ginidae murinai, taunimanima dekenai ena palani ia hadibaia. Unai lalohadai idia ura henia bona idia gwau, ‘Gaukara ita karaia hamatamaia.’

Israela taudia edia inai taudia ese magu haginia gaukarana idia itaia neganai, idia gwau: ‘Do ita daekau bona ita hamasedia. Edia gaukara ita koua.’ To Nehemia be unai ia kamonai, bona gaukara taudia dekenai tuari kaia bona io ia henia. Bona ia gwau: ‘Iseda inai taudia dekenai umui gari lasi. Emui tadikaka, natudia, adavadia bona ruma totona umui tuari.’

Vadaeni, idia gari lasi. Dina bona hanuaboi edia tuari gaudia idia atoa hegaegae bona haginia gaukarana idia karaia noho. Dina 52 murinai magu idia haginia haorea. Hari hanua taudia idia gari lasi. Nehemia bona Esera ese taunimanima dekenai Iehova ena taravatu idia hadibaia, bona idia moale.

To Israela taudia edia noho be guna Babulonia dekenai idia do lao lasi negana bamona lasi. Parasa ena king ese idia ia lohiaia bona ena gaukara idia karaia. To Iehova ia gwauhamata king matamata ta do ia siaia, bona unai king ese taunimanima dekenai maino do ia mailaia. Unai king be daika? Tanobada dekenai edena bamona maino do ia havaraia? Lagani 450 do idia ore guna bena unai do idia dibaia. Bena mero hereadaena ta ia vara. To unai be sivarai ma ta.