IESU be Samaria ena ranu guri ta badinai ia laga-ani. Iena hahediba taudia be hanua lalonai idia vareai aniani idia hoia totona. Iesu ese ia hereva henia noho hahinena be ranu abia totona ia mai. Ia dekenai ia gwau: ‘Lau dekenai ranu sisina oi henia.’

Unai hahine be ia hoa bada. Ena badina oi diba, a? Badina Iesu be Iuda tauna bona ia be Samaria hahinena. Bona Iuda taudia momo be Samaria taudia idia ura henia lasi. Idia hereva henidia lasi danu! To Iesu ese taunimanima ibounai ia ura henia. Unai dainai ia gwau: ‘Bema ranu totona oi ia noia tauna oi diba, oi ese ia do oi noia bona mauri henia ranuna be oi dekenai do ia henia.’

Hahine ia gwau: ‘Egu lohia e, inai ranu guri be ia dobu bona oi be baketi lasi. Inai mauri henia ranuna be edeseni amo do oi abia?’

Iesu ia gwau: ‘Bema inai guri ena ranu oi inua, do oi ranu mase lou. To lau henia ranuna amo taunimanima idia mauri hanaihanai diba.’

Hahine ia gwau: ‘Egu lohia e, lau dekenai inai ranu oi henia! Bena do lau ranu mase lou lasi. Bona iniseniai do lau mai lasi ranu abia totona.’

Hahine ia laloa Iesu be ranu korikorina ia herevalaia. To ia be Dirava bona ena basileia ena hereva momokani ia herevalaia. Inai hereva momokani be mauri henia ranuna bamona. Ta dekenai mauri hanaihanai ia henia diba.

Hari Iesu ese hahine ia hamaoroa: ‘Oi lao, emu tau oi boiria bona umui giroa mai.’

Ia haere: ‘Lau be adavana lasi.’

Iesu ia gwau: ‘Emu haere be maoro. To guna oiemu adavadia be 5, bona hari tau ta danu oi noho, to ia be emu adavana lasi.’

Hahine ia hoa, badina unai ibounai be momokani. Iesu be edena bamona unai gaudia ia diba? Oibe, badina Iesu be Dirava ese ia siaia Gwauhamata Tauna, bona Dirava ese ia dekenai unai gaudia ia hadibaia. Unai neganai Iesu ena hahediba taudia idia giroa, bona idia hoa badina Iesu be Samaria hahinena ta ia hereva henia noho.

Unai ibounai amo dahaka ita dibaia? Ia hahedinaraia Iesu be bese idauidau taudia ibounai ia hebogahisi henia. Bona unai bamona ita karaia danu be namo. Namo lasi ita laloa haida be dika badina idia be bese idauna amo. Iesu ia ura taunimanima ibounai be mauri hanaihanai ia lao henia hereva momokanina idia dibaia. Namona be ita danu ese taunimanima ita durua hereva momokani idia dibaia totona.