INAI tatau badadia ia hereva henia noho mero matamatana mani oi itaia. Idia be Dirava ena dubu Ierusalema dekenai idia gaukara hadibaia taudia. Bona inai mero be Iesu. Ia tubu daekau vadaeni. Hari ena mauri lagani be 12.

Inai hadibaia taudia idia hoa bada herea badina Iesu be Dirava bona Baibel lalonai idia torea herevadia ia diba momo. To dahaka dainai Maria bona Iosepa be iniseni idia noho lasi? Idia be edeseniai? Mani ita itaia.

Lagani ta ta ai Iosepa ese ena ruma bese be Ierusalema dekenai ia abidia lao Pasova ariana totona. Nasareta bona Ierusalema edia padana be daudau herea. Unai nega ai motuka bona trein be lasi. Taunimanima momo idia raka, bona dina toi murinai Ierusalema dekenai idia ginidae.

Hari Iosepa ena ruma bese be bada dainai, Iesu ena tadidia bona taihudia haida ia naria. Vadaeni, inai lagani ai Iosepa bona Maria be edia natudia danu edia hanua Nasareta dekenai idia giroa noho. Idia laloa Iesu be ma haida danu ia raka noho. To dina ena dokona ai idia laga-ani gwauraia neganai, Iesu idia davaria lasi. Edia varavara bona turadia huanai ia idia tahua, to ia be idia danu ia noho lasi! Unai dainai Ierusalema dekenai idia giroa lou unuseniai ia idia tahua totona.

Gabeai Iesu be iniseniai hahediba taudia danu idia davaria. Edia hereva ia kamonai bona ia henanadai henidia. Bona taunimanima ibounai be Iesu ena aonega dekenai idia hoa. To Maria ia gwau: ‘Egu natuna e, dahaka dainai ai dekenai inai bamona oi karaia? Emu tamana bona lau ai lalo-hekwarahi bada oi ai tahua totona.’

Iesu ia gwau: ‘Dahaka dainai lau umui tahua? Umui diba lasi lau be egu Tamana ena ruma dekenai lau noho, a?’

Oibe, Iesu ia ura bada Dirava ia dibaia diba gabuna dekenai ia noho. Ita danu be unai bamona ita laloa be namo, ani? Edia hanua Nasareta dekenai, pura ta ta ai Iesu be tomadiho totona hebou dekenai ia lao. Ia kamonai namonamo dainai, Baibel amo gau momo ia dibaia. Namona be Iesu ena kara ita tohotohoa.