INAI aneru oi itaia dibura ruma ena iduara ia kehoa bona dogoatao noho. Ia ruhaia taudia be Iesu ena aposetolo taudia. Dibura ruma lalonai idia atodia ena badina mani ita tahua.

Iesu ena hahediba taudia be lauma helaga idia abia murinai inai ia vara: Adorahi ta ai Petero bona Ioane be Ierusalema ena dubu lalonai idia vareai. Unuseniai, aena dika tauna ta be iduara badinai ia helai. Dina ibounai taunimanima ese iniseni idia huaia mai, unai amo dubu lalonai idia vareai taudia amo moni ia noia diba. Petero bona Ioane ia itaia neganai, ia noidia gau ta idia henia totona. Aposetolo taudia be dahaka idia karaia?

Idia gini bona inai tauna idia itaia. Petero ia gwau: ‘Lau be moni lasi, to lau dekenai ia noho gauna do lau henia. Iesu ena ladana dekenai, oi toreisi bona oi raka!’ Bena Petero ese ena imana idibana ia dogoatao, bona maoromaoro ia roho bona ia raka matamaia. Taunimanima ese unai hoa kara namona idia itaia neganai, idia hoa bona idia moale.

Petero ia gwau: ‘Mase amo Iesu ia hatorea isi lou Diravana ena siahu amo inai hoa karana ai karaia.’ Ia bona Ioane idia hereva noho lalonai, tomadiho gunalaia taudia haida idia mai. Petero bona Ioane ese Iesu ena toreisi lou sivaraina be taunimanima dekenai idia gwauraia dainai idia badu. Unai dainai idia abidia bona dibura ruma dekenai idia atodia.

Murina dinana ai, tomadiho gunalaia taudia be hebou badana ta idia karaia. Petero, Ioane bona idia hanamoa tauna idia boiria. Tomadiho gunalaia taudia idia henanadai: ‘Inai hoa karana be daika ena siahu amo umui karaia?’

Petero ese idia ia hamaoroa, mase amo Iesu ia hatorea isi lou Diravana ena siahu amo unai idia karaia. Hahelaga taudia idia daradara, badina idia diba hoa karana ta ia vara vadaeni. Unai dainai aposetolo taudia idia hadibaia Iesu do idia herevalaia lou lasi, bona idia siaidia.

Idia hanaia dinadia lalonai, aposetolo taudia be Iesu ena sivarai idia harorolaia bona gorere taudia idia hanamoa noho. Unai hoa karadia edia sivarai be gabu ibounai dekenai idia kamonai. Unai dainai Ierusalema kahirakahira idia noho hanuadia amo hutuma ese gorere taudia idia mailaia aposetolo taudia ese idia hanamodia totona. Tomadiho gunalaia taudia idia mama, unai dainai aposetolo taudia idia abia bona dibura ruma lalonai idia atodia. To unuseniai idia noho daudau lasi.

Hanuaboi ai Dirava ena aneru ese dibura ruma ena iduara ia kehoa, inai laulau dekenai oi itaia bamona. Aneru ia gwau: ‘Umui lao bona dubu helaga lalonai umui gini. Bona taunimanima umui hereva henia noho.’ Murina dinana ai, tomadiho gunalaia taudia ese tatau haida idia siaia aposetolo taudia idia abia totona neganai, idia noho lasi. Gabeai, unai tatau ese idia davaridia dubu dekenai idia hadibaia noho bona Sanhedrin kota rumana dekenai idia mailaia.

Tomadiho gunalaia taudia idia gwau: ‘Umui ai hamaoroa Iesu ena ladana umui hadibaia lou lasi. To Ierusalema be emui hahediba amo umui hahonua vadaeni.’ Bena aposetolo taudia idia hereva: ‘Emai lohia bamona Dirava ai kamonai henia be namo, taunimanima lasi.’ Unai dainai, “sivarai namona” idia harorolaia noho. Unai be haheitalai namona ita tohotohoa totona, ani?