MADI! Iniseniai dahaka ia vara noho? Tano dekenai ia hekure noho merona be bero bada ia davaria, a? Itaia! ruma amo ia raka-lasi noho tauna ta be Paulo! Unuseniai Timoteo oi itaia diba danu, a? Inai mero be uindo amo ia moru, a?

Oibe, uindo amo ia moru. Iniseniai Paulo be Troa dekenai idia noho hahediba taudia dekenai hereva ta ia henia. Ia diba nega daudau herea lalonai idia do ia itaia lasi, badina murina dinana ai bouti ta amo do ia lao. Unai dainai ia hereva noho ela bona hanuaboi momokani.

Inai mero ladana Eutiko be uindo dekenai ia helai, bona ia mahuta. Ia be unai 3-sitori rumana ena uindo amo maoromaoro tano dekenai ia moru diho! Unai dainai taunimanima oi itaia, idia lalo-hekwarahi bada. Tatau ese mero idia abia isi neganai idia gari be mai ena badina. Ia mase vadaeni!

Paulo ia itaia mero ia mase neganai, ia latanai ia hekure bona ia rosia. Bena ia gwau: ‘Laloa lasi. Ia namo vadaeni!’ Bona momokani, ia namo! Unai be hoa karana ta! Paulo ese ia hamauria lou! Hutuma idia moale bada.

Idia ibounai be ataiai daiutuna dekenai idia daekau lou bona idia aniani. Paulo ia hereva noho ela bona daba ia rere. To ita daradara lasi, unai murinai Eutiko be ia mahuta lou lasi! Bena Paulo, Timoteo bona idia danu idia laolao taudia be bouti dekenai idia guia. Idia lao gabuna oi diba, a?

Paulo ena laolao ihatoina be ia ore gwauraia, bona ena ruma dekenai ia giroa lao noho. Unai laolao lalonai Paulo be Efeso dekenai lagani toi ia noho. Unai dainai unai laolao ese laolao iharuana ena daudau ia hanaia.

Troa ia rakatania murinai, bouti be nega sisina lalonai Mileto dekenai ia ginidae. Efeso ena padana Mileto amo be daudau lasi dainai, Paulo ese hereva ia siaia Efeso kongrigeisen ena tau badadia idia mai totona, unai amo idia ia hereva henia diba. Gabeai, bouti ia heau gwauraia neganai, Paulo do ia lao dainai idia lalohisihisi bada!

Dokonai, bouti be Kaisarea dekenai ia ginidae. Paulo be hahediba tauna Filipo ena ruma dekenai ia noho neganai, peroveta tauna Agabo ese hadibaia herevana ta ia gwauraia. Ia gwau Paulo be Ierusalema dekenai ia lao neganai, ia be dibura tauna ai do idia halaoa. Bona unai bamona ia vara. Bena Kaisarea ena dibura ruma dekenai lagani rua ia noho murinai, Roma dekenai idia siaia lao Kaisara ena vairanai idia kota henia totona. Roma ia lao henia noho lalonai ia vara gauna mani ita itaia.