PAULO dekenai idia noho seini, bona ia gimaia totona idia atoa Roma tuari tauna mani oi itaia. Paulo be Roma ena dibura ruma dekenai ia noho. Roma ena Kaisara ena hahemaoro herevana ia naria noho. Dibura tauna bamona ia noho neganai, taunimanima ese idia vadivadi henia diba.

Paulo be Roma dekenai ia ginidae bena dina toi murinai, Iuda gunalaia taudia haida dekenai hereva ia siaia ia idia vadivadi henia totona. Unai dainai Roma dekenai idia noho Iuda taudia momo idia mai. Paulo ese idia dekenai Iesu ena sivarai bona Dirava ena basileia ia harorolaia. Haida ese idia abia dae bona Keristani taudia ai idia lao, to haida be lasi.

Paulo be ia idia naria tuari taudia idauidau dekenai ia haroro danu. Dibura ruma dekenai ia noho lagani rua lalonai, Paulo ese taunimanima ibounai ia haroro henidia toho. Unai dainai, Kaisara ena ruma taudia haida be Basileia ena sivarai namona idia kamonai bona idia haida be Keristani taudia ai idia lao.

To teibolo dekenai ia toretore noho vadivadi tauna be daika? Oi gwauraia toho diba, a? Oibe, ia be Timoteo. Timoteo be Basileia ia harorolaia dainai, dibura ruma dekenai idia atoa danu. Bona iniseni ia mai Paulo ia durua totona. Ia torea noho revarevana oi diba, a? Mani ita itaia.

Sivarai namba 110 dekenai ita herevalaia hanuadia Filipo bona Efeso oi laloatao, a? Paulo ena heduru amo Keristani kongrigeisen be unuseniai idia haginidia. Hari, dibura ruma lalonai ia noho lalonai, Paulo ese unai Keristani taudia dekenai revareva ia torea. Unai revareva be Baibel lalonai, bona idia gwauraidia Efeso bona Filipo. Paulo be Timoteo ia hadibaia dahaka do ia torea edia Keristani turadia Filipo dekenai.

Filipo taudia be Paulo dekenai idia hebogahisi bada. Dibura ruma dekenai ia noho neganai harihari gauna ta idia siaia, unai dainai Paulo ese ia tanikiu henidia. Epafrodito ese unai harihari gauna ia mailaia. To ia gorere bada herea bona kahirakahira ia mase. To hari ia namo lou bona ia giroa lou gwauraia. Filipo dekenai ia giroa lou neganai, Paulo bona Timoteo edia revareva do ia abia lao.

Paulo be dibura ruma lalonai ia do noho neganai, Baibel lalonai idia noho revareva ma rua ia torea. Ta be Kolose hanua dekenai idia noho Keristani taudia totona. Unai revareva ena ladana oi diba, a? Kolose. Revareva ma ta be Kolose dekenai ia noho turana namona ta ladana, Filemona, dekenai ia siaia. Unai revareva lalonai Filemona ena hesiai tauna Onesimo ia herevalaia.

Onesimo be Filemona amo ia heau bona Roma dekenai ia lao. Dala ma ta amo Onesimo ese Paulo be dibura ruma dekenai ia noho sivaraina ia kamonai. Bona Paulo vadivadi henia totona ia lao neganai, Paulo ese ia haroro henia. Nega sisina murinai, Onesimo be Keristani tauna ai ia lao. Hari Onesimo ia heau dainai ia sori bada. Unai dainai, Paulo be Filemona dekenai inai revareva lalonai ia torea herevana oi diba, a?

Paulo ese Filemona ia noia Onesimo ena dika ia gwauatao totona. Paulo ia gwau: ‘Oi dekenai lau siaia lou. To hari ia be emu hesiai tauna sibona lasi. Ia be Keristani tadikaka namona ta danu.’ Onesimo be Kolose dekenai ia giroa lou neganai, inai revareva rua ia abia lao, ta be Kolose taudia edia bona ma ta be Filemona ena. Filemona ia kamonai ena hesiai tauna be Keristani tauna ai ia lao neganai, reana ia moale bada herea.

Paulo be Filipo taudia bona Filemona ia tore henidia neganai, sivarai namona ia siaia. Paulo ese Filipo taudia ia hamaoroa: ‘Timoteo do lau siaia umui dekenai. To kahirakahira umui do lau vadivadi henia danu.’ Bona Filemona ia hamaoroa: ‘Egu noho gabuna oi atoa hegaegae.’

Paulo be dibura ruma amo idia ruhaia neganai, ena tadikaka bona taihu gabu momo dekenai ia vadivadi henia. To gabeai Paulo be Roma ena dibura ruma dekenai idia atoa lou. Hari ia diba ia do idia hamasea. Unai dainai Timoteo dekenai revareva ia siaia bona ia hamaoroa do ia mai haraga. Paulo ia gwau: ‘Dirava lau abidadama henia dainai, Dirava ese egu davana do ia henia.’ Paulo idia hamasea bena lagani haida murinai, Roma taudia ese Ierusalema idia hadikaia lou.

To sivarai momo be Baibel lalonai idia noho. Iehova ese aposetolo Ioane ia hamaoroa ena buka ginigabedia ia torea totona, Apokalupo bukana danu. Unai Baibel bukana ese gabeai do idia vara gaudia ia gwauraia. Mani vaira negana ai do idia vara gaudia haida ita dibaia.