INAI laulau dekenai aposetolo Paulo ida ia gini merona be Timoteo. Timoteo be ena ruma bese danu Lusitera hanua dekenai ia noho. Iena sinana ena ladana be Eunike bona ena tubuna hahine ena ladana be Loi.

Inai be Paulo ena nega ihatoina Lusitera ia vadivadi henia totona. Lagani tamona bamona gunanai, Paulo bona Banaba be unuseniai idia lao guna idia haroro totona. Bona hari Paulo be ena turana Sila danu idia giroa lou.

Paulo be Timoteo dekenai ia gwauraia noho herevana oi diba, a? Ia henanadai: ‘Oi ura Sila bona lau oi bamoa, a? Ai oi durua diba gabu daudau dekenai idia noho taudia haroro henidia totona.’

Timoteo ia haere: ‘Oibe, lau ura.’ Nega daudau lasi murinai Timoteo ese ena ruma bese ia rakatania bona Paulo bona Sila ia bamoa. To edia laolao ena sivarai ita do dibaia lasi neganai, Paulo dekenai idia vara gaudia mani ita laloa guna. Iesu be ia dekenai Damaseko dala ai ia hedinarai negana amo, lagani 17 idia ore vadaeni.

Laloaboio lasi, Paulo be Damaseko dekenai ia lao Iesu ena hahediba taudia ia dagedage henia totona, to hari ia danu be hahediba tauna ta! Gabeai, ena inai taudia haida idia ura Paulo idia alaia, badina idia ura lasi Iesu ena sivarai ia hadibaia. To hahediba taudia ese Paulo idia durua ia heau mauri totona. Bosea ta lalonai idia udaia bona hanua ena magu murimuri kahana dekenai idia hadihoa.

Gabeai Paulo be Antioka dekenai ia lao ia haroro totona. Unuseniai Iesu murinai idia raka taudia be Keristani taudia idia gwauraia matamaia. Bena Paulo bona Banaba be Antioka amo idia siaia lao daudau tanodia dekenai idia haroro totona. Idia vadivadi henia hanuana ta be Lusitera, Timoteo ena hanua unai.

Lagani ta bamona murinai, Paulo ena laolao iharuana ai Lusitera ia vadivadi henia. Timoteo be Paulo bona Sila danu gabu idia rakatania neganai, idia lao gabuna oi diba, a? Mapu oi itaia, bona gabu haida mani ita dibaia.

Guna idia be kahirakahira ia noho gabuna, Ikonio dekenai idia lao, bena hanua iharuana ladana Antioka dekenai. Unai murinai, Troa dekenai idia lao, bena Filipi, Tesalonika bona Berea dekenai idia lao. Mapu dekenai Atena oi itaia, a? Paulo be unuseniai ia haroro. Unai murinai lagani ta bona hua 6 lalonai Korinto dekenai idia haroro. Dokonai, nega sisina Efeso dekenai idia noho. Bena bouti amo Kaisarea dekenai idia giroa lou bona Antioka​—Paulo ena noho gabuna​—dekenai idia daekau lao.

Unai dainai Timoteo be Paulo ia durua “sivarai namona” idia harorolaia bona Keristani kongrigeisen momo idia hamatamaia totona kilomita handred momo ia laolao. Oi bada neganai, Timoteo bamona Dirava ena kamonai hesiai tauna ta ai do oi lao, a?