DALA dekenai ia hekure noho tauna oi diba, a? Inai tauna be Saulo. Laloaboio lasi, ia ese Stefano be nadi amo idia hodoa mase taudia edia kouti ia naria. Unai diari badana oi itaia! Dahaka ia vara noho?

Stefano idia hamasea murinai, Saulo be haida ia hakaudia Iesu murinai idia raka taudia idia hadikadia totona. Edia ruma ta ta dekenai ia vareai, ia veridia raka-lasi bona dibura ruma dekenai ia negedia. Hahediba taudia momo be hanua haida dekenai idia heau lao bona unuseniai “sivarai namona” idia harorolaia matamaia. To Saulo be hanua ma haida dekenai ia lao Iesu murinai idia raka taudia ia tahudia totona. Hari ia be Damaseko dekenai ia lao noho. To, ia lao noho lalonai, inai hoa gauna ia vara:

Guba amo diari ta ese Saulo ia gegea. Tano dekenai ia moru, inai laulau dekenai ita itaia bamona. Bena gado ta ia gwau: ‘Saulo e, Saulo e! Dahaka dainai lau oi dagedage henia noho?’ Saulo idia bamoa taudia ese diari idia itaia bona gado ta idia kamonai, to unai hereva ena anina idia lalo-pararalaia lasi.

Saulo ia henanadai: ‘Lohiabada e, oi be daika?’

Unai gadona ia gwau: ‘Lau be Iesu. Oi ese oi dagedage henia tauna.’ Iesu be unai bamona ia hereva badina Saulo ese ena murinai idia raka taudia ia dagedage henia neganai, Iesu ia mamia ia idia dagedage henia bamona.

Saulo ia henanadai: ‘Lohiabada e, dahaka do lau karaia?’

Iesu ia gwau: ‘Oi toreisi bona Damaseko hanua lalonai oi raka vareai. Unuseniai tau ta ese do oi karaia gauna do ia hamaoroa.’ Saulo ia toreisi bona ena matana ia kehoa neganai, gau ta ia itaia diba lasi. Ena matana ia kepulu! Unai dainai ia idia bamoa taudia ese ena imana idia dogoatao bona Damaseko dekenai idia hakaua lao.

Bena Iesu be ena hahediba tauna ta Damaseko dekenai ia hereva henia, ia gwau: ‘Anania e, oi toreisi. Dala ladana “Maoro” dekenai oi lao. Iuda ena ruma dekenai tau ta ladana Saulo totona oi henanadai. Ia lau abia hidi egu hesiai tauna namona ai ia lao totona.’

Anania ia kamonai. Saulo ia hedavari henia neganai, ena imana be ia latanai ia atoa bona ia gwau: ‘Lohiabada ese lau ia siaia emu matana do lau kehoa bona lauma helaga amo oi honu totona.’ Maoromaoro gwarume kopina bamona gaudia be ena matana amo idia moru bona ia itaia lou diba.

Iesu ese dala badana ai Saulo ia gaukaralaia bese idauidau dekenai ia haroro totona. Aposetolo Paulo ai ia lao bona gabeai ena sivarai momo do ita dibaia. To guna, Dirava ese Petero dekenai ia henia gaukarana mani ita itaia.