Dirava ia ura taunimanima ibounai be guriguri karana amo Ia kahirakahira idia lao. (Salamo 65:2) To, Ia ese guriguri haida ia kamonai henia lasi o abia dae lasi. Hegeregere, adavana ia kara auka henia tauna ena guriguri ibounai be Dirava ese do ia abia dae lasi. (1 Petero 3:7) Danu, Israela taudia idia kara dika loulou neganai, Dirava ese edia guriguri ia kamonai henia lasi. Momokani, guriguri karana ita matauraia be gau badana. Danu, bema kara dika rohoroho idia karaia taudia idia helalo-kerehai, Dirava ese edia guriguri do ia abia dae.—Isaia 1:15; 55:7 duahia.

Guriguri be tomadiho karana ta. Unai dainai, namona be ita ia havaraia Diravana, Iehova, sibona ita guriguri henia. (Mataio 4:10; 6:9) Ita be goevadae lasi taudia dainai, Iesu ena ladana ai ita guriguri be namo, badina ia be eda kara dika dainai ia mase. (Ioane 14:6) Iehova ia ura lasi eda guriguri herevadia be pepa ai ita torea o ita lalodiatao, bena ita gwauraia loulou. Ia ura eda kudouna amo Ia ita guriguri henia.—Mataio 6:7; Filipi 4:6, 7 duahia.

Iseda lalona ai ita gwauraia guriguridia be Dirava ese ia kamonai henia diba. (1 Samuela 1:12, 13) Ia ura nega idauidau ai—daba, adorahi, aniani negadiai, bona hekwakwanai negadiai—Ia ita guriguri henia.—Salamo 55:22; Mataio 15:36 duahia.

Dirava idia abidadama henia lasi taudia bona Iena gwauhamata—tanobada ai maino do ia vara gwauhamatana —idia kirikirilaia taudia huanai ita noho dainai, Dirava ita tura henia be mai ena hekwarahi. (2 Timoteo 3:1, 4; 2 Petero 3:3, 13) Unai dainai, Keristani taudia momokanidia ida ita hebou neganai, do ita hagoadaia heheni.—Heberu 10:24, 25 duahia.

Dirava idia lalokau henia taudia ita bamoa neganai, idia ese ita do idia durua Dirava ita tura henia totona. Iehova ena Witnes taudia edia hebou lalodiai, taunimanima be idia hagoadaia heheni.—Roma 1:11, 12 duahia.

Baibel amo oi dibaia herevadia oi laloa dobu karana ese oi do ia durua, Dirava oi tura henia totona. Iehova ena kara, sisiba, bona gwauhamata herevadia oi laloa dobu. Mai guriguri ida unai bamona oi karaia neganai, Iehova ena lalokau bona aonega do oi lalopararalaia namonamo.—Iosua 1:8; Salamo 1:1-3 duahia.

Iehova oi tura henia dalana badana be inai: Ia dekenai oi tabekau bona ia oi abidadama henia. Ita hadoa flaoa ia mauri totona, ita dairia hanaihanai be gau badana. Unai hegeregerena, eda abidadama ia goada totona, namona be Baibel amo ita dibaia bona ita abia dae hereva badadia be hanaihanai ita laloa dobu.—Mataio 4:4; Heberu 11:1, 6 duahia.

Iehova be Ia idia lalokau henia taudia ia lalodia. Ia ese idia ia gimaia badina ia ura lasi gau ta ese edia abidadama bona mauri hanaihanai helarona do ia hadikaia. (Salamo 91:1, 2, 7-10) Ia ese ita ia hadibaia, eda tauanina bona eda moale idia hadikaia diba daladia ita dadaraia. Iehova ese mauri dala hereadaena be ita dekenai ia hadibaia.—Salamo 73:27, 28; Iamesi 4:4, 8 duahia.