Dirava ia ura taunimanima be tanobada ai mauri idia moalelaia. Ia ese taunimanima ia lalokau henia dainai, inai tanobada bona tanobada latanai idia noho gaudia ibounai ia havaraia. Kahirakahira, Dirava ese tanobada ibounai do ia hanamoa, bena taunimanima ese do idia noholaia. Ia ese taunimanima idia hahisia gaudia do ia haorea.—1 Timoteo 6:19 duahia.

Idaunega amo ema bona hari, gavamani ta ese dagedage, gorere, o mase ia haorea lasi. To, sivarai namona be inai: Kahirakahira, Dirava ena gavamani ese tanobada gavamani ibounai edia gabu do ia abia. Dirava ena gavamani henunai do idia noho taudia be maino bona mauri goevadaena do idia moalelaia.—Isaia 25:8; 33:24; Daniela 2:44 duahia.

Dirava ese inai tanobada amo taunimanima dikadia ia kokia neganai, hisihisi do idia ore. (Sepanaia 2:3) Unai be edena negai do ia vara? Baibel be gau haida ia perovetalaia. Hari, unai gaudia idia vara noho dainai, taunimanima edia mauri idia dika idia lao noho. Unai ese ia hahedinaraia, Dirava ese kara ta do ia karaia negana be kahirakahira.—2 Timoteo 3:1-5 duahia.

Namona be Baibel amo Dirava ita dibaia. Baibel be leta ta bamona, tama lalokauna ta ese ita dekenai ia siaia mai. Baibel ese hari bona vaira negana ai tanobada dekenai mauri do ita moalelaia dalana ia hadibaia. Momokani, Baibel ena anina oi lalopararalaia totona haida amo heduru oi abia, to ma haida be do idia moale lasi. To, Dirava ia gwauhamata, vaira negana ai eda mauri do ia hanamoa. Unai dainai, Baibel stadilaia karana ita hadokoa lasi be gau badana.—Aonega Herevadia 29:25; Apokalupo 14:6, 7 duahia.