Revareva ta Hakaua Oreana Amo
“Umui be hadibaia taudia ai umui lao be namo.” (Heb. 5:12) Mani oi laloa! Iehova—guba bona tanobada ena Hadibaia Tauna hereadaena—ese ita ia boiria ma haida dekenai ia ita herevalaia totona! Ena be asainmen be idauidau—ruma bese lalonai, kongrigeisen lalonai, eiava haroro gaukara lalonai—to Iehova ena hereva momokani ita herevalaia be hahenamo ta bona maduna badana. Edena dala ai unai ita karaia namonamo diba?
Haere be aposetolo Paulo ese Timoteo dekenai ia siaia revareva lalonai oi davaria diba. Ia gwau: “Oi gaukara goada taunimanima vairanai oi duahiduahi noho, sisiba oi henia noho bona oi hadibaia noho.” Ma Paulo ia gwau: “Unai bamona oi karaia neganai, oi sibona bona oi dekenai idia kamonai taudia do oi hamauria.” (1 Tim. 4:13, 16) Oi harorolaia sivarai be taunimanima hamauria sivaraina. Unai dainai emu duahiduahi bona hadibaia karana oi hanamoa be gau badana. Inai buklet be oi ia durua totona idia karaia. Mani ena kahana haida ita laloa.
Buklet ena rau ta ta ai Baibel siri idia noho, bona unai be stadi point ia durua Baibel ena hakaua herevana ta, eiava haheitalai ta.
Iehova be “Hadibaia Tauna Badana”. (Isa. 30:20, NWT) Inai buklet ese oi do ia durua emu duahiduahi bona hadibaia karana do ia hanamoa, danu laloatao ita herevalaia sivaraina be Iehova amo bona ia ese taunimanima ia veria mai. (Ioane 6:44) Unai dainai, nega ibounai lauma helaga totona oi guriguri bona hanaihanai Dirava ena Hereva oi gaukaralaia. Iehova oi hanamoa, to sibona oi hanamoa lasi. Oi gaukara goada kamonai taudia edia kudouna ai Iehova idia lalokau henia totona.
Oi ai boiria taunimanima dekenai unai mai anina bada sivaraina oi hadibaia totona. Ai diba bema “Dirava ese ia henia goada dekenai” oi tabekau, do oi kwalimu.—1 Pet. 4:11.
Umui ida ai gaukara hebou taudia,
Iehova Ena Witnes Taudia Edia Hakaua Oreana
