Eda ruma bese durua gaudia hoia totona, moni be gau badana. (Aonega Herevadia 30:8) Oibe, “moni ese oi ia gimaia noho diba.” (Hadibaia Tauna 7:12) Nega haida moni umui herevalaia be auka, to namo lasi unai ese hepapahuahu ia havaraia. (Efeso 4:32) Headava taudia idia abidadama heheni bona mai lalotamona ida moni gaukaralaia dalana idia abia hidi be namo.

BAIBEL IA GWAU: “Bema umui ta ia ura kohoro ta ia haginia, do ia helai guna bona ena davana do ia laloa, do ia itaia bema ia hegeregere kohoro ia haorea diba eiava lasi.” (Luka 14:28) Gau badana be moni gaukaralaia dalana umui palanilaia hebou. (Amosa 3:3) Namona be umui abia hidi namonamo dahaka gaudia do umui hoia bona moni hida do umui gaukaralaia. (Aonega Herevadia 31:16) Ena be emui moni be hegeregere, to aonega dalanai umui gaukaralaia. Abitorehai karana umui dadaraia. Umui dekenai ia noho moni sibona umui gaukaralaia.​—Aonega Herevadia 21:5; 22:7.

OI KARAIA DIBA GAUNA:

• Bema hua dokonai, moni sisina ia do noho, namona be umui abia hidi edena dala ai do umui gaukaralaia

• Bema emui moni ia hegeregere lasi, namona be emui lista amo gau haida umui kokia. Hegeregere, ruma dekenai umui aniani, to stoa dekenai umui aniani lasi

BAIBEL IA GWAU: “Mai momokani ida unai gaudia ai henia, Iehova ena matanai sibona lasi, to taunimanima edia matanai danu.” (2 Korinto 8:21) Mai momokani ida emu adavana oi hadibaia emu pei be hida bona moni hida oi gaukaralaia.

Hanaihanai emu adavana ida moni do umui gaukaralaia dalana umui herevalaia hebou. (Aonega Herevadia 13:10) Unai bamona umui karaia neganai, emui headava lalonai hepapahuahu do idia vara lasi. Namo lasi oi laloa emu pei be oi sibona emu moni, to ia be emu ruma bese ena moni danu.​—1 Timoteo 5:8.

OI KARAIA DIBA GAUNA:

• Namona be umui lalotamona umui ta ta sibona ese moni hida do umui gaukaralaia

• Namo lasi umui naria ela bona hekwakwanai ia vara bena moni umui herevalaia