Ta be emu turana ai ia lao totona oi gaukara goada; oi ia tura henia noho totona do oi gaukara goada danu. Oiemu hekwarahi Dirava ena turana ai oi lao, bona ia oi tura henia noho totona be do ia hanamoa. Iesu ese ia idia abidadama henia taudia dekenai ia gwau: “Hereva momokani ese umui do ia ruhaia.” (Ioane 8:32) Unai ena anina be dahaka?

Hari inai negai oi ia ruhaia dainai oi moale diba. Satani ese ia halasia hahediba hereva koikoi bona hereva koikoidia amo, oi do ia ruhaia diba. Iehova idia diba lasi taudia milioni momo edia helaro lasi maurina amo, oi do ia ruhaia diba. (Roma 8:​22) Danu, Dirava ena turadia be ‘mase ena gari ese ia guidia lasi.’​​—Heberu 2:​14, 15.

Dirava ena tanobada matamatana ai gau dikana ta ese oi do ia guia lasi dainai do oi moale diba. Vaira neganai gau dikana ta ese oiemu moale do ia koua lasi! Paradaiso tanobadana ai, tuari, gorere, bona kara dikadia ese oi do idia guia lasi. Ogogami bona hitolo be lasi. Buruka bona mase do idia ore. Gari, dagedage, bona kara gageva do idia vara lasi. Baibel ese Dirava ia herevalaia, ia gwau: “Oi be emu imana oi kehoa noho bena mauri gaudia ibounai edia ura oi hagugurua noho.”​​—Salamo 145:​16, NW.

Dirava ena turadia be do idia mauri noho ela bona hanaihanai. Mauri hanaihanai be Dirava ese iena hetura karana idia tahua taudia dekenai ia henia dava bada harihari gauna. (Roma 6:​23) Mani mauri hanaihanai ena anina oi dekenai oi laloa!

Nega ia noho gau momo do oi karaia totona. Reana oi ura miusiki gauna ta gadaralaia dalana do oi diba. Eiava reana oi ura laulau penia karana oi diba eiava kapenta tauna ai oi lao. Reana oi ura animal eiava tubutubu gaudia dekenai oiemu diba do oi habadaia. Eiava reana oi ura loaloa bona tano bona taunimanima idauidau do oi itaia. Mauri hanaihanai oi abia neganai, unai ibounai do oi karaia diba!

Nega ia noho turadia momo do oi abia totona. Mauri hanaihanai ese dala ia kehoa, Dirava ena turadia ai idia lao taudia ma haida do oi diba totona. Edia diba bona edia kara namodia do oi diba, bona oiemu turadia ai do idia lao danu. Do oi lalokau henidia, bona oi do idia lalokau henia. (1 Korinto 13:8) Mauri hanaihanai dainai nega do ia noho, tanobada ai idia noho taudia ibounai do oi tura henia totona! To gau hereadaena be, lagani idia hanaia lalonai emu hetura karana Iehova ida do ia goada ia lao noho. Emai ura be oi be Dirava ena turana ela bona hanaihanai!