Dirava ia ura iena turana ai oi lao. Guba bona tanobada ena Tau hereadaena ena turana ai oi lao diba be nega ta oi lalohadailaia, a? Aberahamo, gunaguna ia noho tauna, idia gwauraia Dirava ena turana. (Iamesi 2:​23) Baibel lalonai edia sivarai idia noho taudia ma haida danu ese Dirava ena hetura karana idia moalelaia bona hahenamo bada idia abia. Hari inai negai, tanobada ena kahana ibounai idia noho taudia be Dirava ena turana ai idia lao. Oi danu be Dirava ena turana ai oi lao diba.

Dirava ena turana ai oi lao ese taunimanima ta ena turana ai oi lao ia hereaia. Dirava ese iena turana namodia do ia rakatania lasi. (Salamo 18:25) Dirava ena turana ai oi lao ese kohu bada ia hereaia. Kohu bada tauna ia mase neganai, haida ese ena moni idia abia. To, Dirava ida hetura karana idia moalelaia taudia dekenai unai hetura karana be dava bada gauna bona ta ese ia kokia diba lasi.​—Mataio 6:​19.

Dirava dekenai diba oi abia karana be reana haida ese idia koua toho. Oiemu turadia bona ruma bese taudia ese unai bamona do idia karaia diba. (Mataio 10:​36, 37) Bema haida ese oi idia kirikirilaia eiava idia hagaria, sibona oi nanadaia, ‘Daika lau ura hamoalea​—taunimanima eiava Dirava?’ Mani inai oi laloa: Bema ta ia gwau oi aniani lasi, do oi kamonai henia, a? Lasi momokani! Oi mauri totona oi aniani be gau badana. To Dirava ese oi dekenai mauri hanaihanai ia henia diba! Unai dainai, Dirava ena turana ai oi lao dalana oi dibaia karana be ta ese ia koua lasi be namo.​—Ioane 17:3.