Bema turana ta oi abia bona ia oi laloa bada bona oi matauraia, oi ura ia hegeregerena ai oi lao. Baibel ia gwau, “Lohiabada be namo bona maoromaoro.” (Salamo 25:8) Dirava ena turana ai ita lao totona, namona be ita be namo bona maoromaoro. Baibel ia gwau: “Dirava ena natuna taudia, iena lalokau, . . . Dirava ena kara bamona do umui karaia be namo. Lalokau ena dala dekenai do umui mauri noho.” (Efeso 5:​1, 2) Unai oi karaia totona dala haida be inai:

Ma haida oi durua. “Taunimanima ibounai dekenai kara namodia do ita karaia.”​​—Galatia 6:​10.

Oi gaukara goada. “Henaoa tauna be do ia henaoa lou lasi. To gaukara namona iena imana dekena amo do ia karaia.”​​—Efeso 4:​28.

Oiemu tauanina bona kara idia goeva be namo. “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo.”​​—2 Korinto 7:1.

 Emu ruma bese taudia oi kara henia mai lalokau bona hemataurai ida. “Tau ese iena adavana do ia lalokau henia, ia sibona ia lalokau henia hegeregerena. Hahine danu ese iena adavana do ia matauraia. Memero bona kekeni e, umui emui tamana bona sinana do umui kamonai henia.”​​—Efeso 5:33–​6:1.

Ma haida dekenai lalokau oi hahedinaraia. “Ita ta ta dekenai ita lalokau henia be namo. Badina lalokau be Dirava dekena amo.”​​—1 Ioane 4:7.

Gavamani ena taravatu badinaia. “Taunimanima ibounai ese gavamani do idia kamonai henia. . . .  Ibounai ta ta dekenai edia davana do umui henidia. Takisi gogoa tauna dekenai takisi do umui henia.”​​—Roma 13:​1, 7.