Dirava ena turana ai oi lao be oi dekenai ia vara diba gauna hereadaena. Dirava ese oi do ia hadibaia oi moale bona oi noho namo totona; ia ese hahediba hereva kereredia bona hadikaia karadia amo oi do ia ruhaia. Oiemu guriguri do ia kamonai. Oi do ia durua lalo-maino bona gari lasi mamina oi moalelaia totona. (Salamo 71:5; 73:28) Dirava ese hekwakwanai negadiai oi do ia hagoadaia. (Salamo 18:18) Bona Dirava ese ena harihari gauna, mauri hanaihanai, be oi dekenai ia henia.​​—Roma 6:​23.

Dirava kahirakahira oi lao neganai, Dirava ena turadia kahirakahira do oi lao. Idia be emu turadia ai do idia lao danu. Momokani, idia do oi abia dae oiemu tadikaka bona taihu bamona. Mai moale ida oi do idia hadibaia Dirava oi diba totona bona oi do idia durua bona hagoadaia.

Dirava danu ita hegeregere lasi. Dirava ena hetura karana oi tahua lalonai, namona be mai anina bada gauna ta oi lalo-pararalaia. Idia hegeregere taudia edia hetura karana be idau bona hetura karana Dirava ida be idau. Ena lagani bona aonega be bada bona ena siahu ese iseda siahu ia hereaia momokani. Ia be iseda Lohia Tauna be maoro. Unai dainai, bema ita ura iena turana ai ita lao, namona be ita kamonai henia bona ia gwauraia gaudia ita badinaia. Unai ese iseda namo do ia havaraia.​​—Isaia 48:18.