Baibel duahia karana amo Iehova oi dibaia diba. Gunaguna Dirava ese taunimanima haida ia abia hidi ena lalohadai idia torea totona. Unai toretore idia gwauraia Baibel. Hari inai negai Baibel duahia karana amo Dirava ita dibaia diba. Iehova ena hereva, eiava ia ura gwauraia gaudia, be Baibel lalonai idia noho dainai, idia gwauraia Dirava ena Hereva. Baibel ia gwauraia gaudia ita abia dae diba, badina Iehova ia koikoi lasi. “Dirava ia koikoi diba lasi.” (Heberu 6:​18) Dirava ena Hereva lalonai be hereva momokani ia noho.​​—Ioane 17:17.

Baibel be Dirava ese ita dekenai ia henia dava bada harihari gauna ta. Baibel be lalokau tamana ta ese ena natudia dekenai ia siaia revarevana bamona. Ita ia hadibaia Dirava ena gwauhamata be, tanobada be noho gabuna namona​​—paradaiso​—ai do ia halaoa. Dirava ese guna, harihari, bona vaira neganai iena abidadama natudia totona ia karaia gaudia ia gwauraia. Ita ia durua danu, eda hekwakwanai ita hamaoromaoroa bona moale ita davaria totona.​​—2 Timoteo 3:​16, 17.

 Iehova ena Witnes taudia be Dirava ena turadia; oi do idia durua Baibel ena hahediba herevadia oi lalo-pararalaia totona. Do oi hadibadia oi ura Baibel oi stadilaia. Moni idia noia lasi unai ena davana totona. (Mataio 10:8) Danu, Keristani heboudia dekenai oi lao diba. Unai hebou be tomadiho gabudia ladana Kingdom Hall dekenai idia karaia. Bema Keristani heboudia oi lao henia, emu diba Dirava dekenai do ia bada ia lao haraga.

Dirava ese ia karaia gaudia amo ia oi dibaia diba. Hegeregere, Baibel ia gwau: “Dirava ese guba bona tanobada ia karaia.” (Genese 1:1) Dirava ese “guba” ia havaraia neganai, ia ese dina ia karaia. Vadaeni, unai dainai Dirava dekenai dahaka ita diba? Ita ia hadibaia Iehova ena siahu be bada herea. Ia sibona ese dina bamona mai ena siahu bada gauna ia karaia diba. Danu, ita ia hadibaia Iehova be mai ena aonega, badina diari bona siahu ia halasia bona ia bodo lasi gauna be aonega tauna sibona ese ia karaia diba.

Dirava ese ia havaraia gaudia idia hahedinaraia ita ia lalokau henia. Mani tanobada ai idia noho au huahua idauidau oi laloa. Iehova ese au huahua tamona​​—eiava ta lasi​​—ita ia henia diba. To, Iehova ese au huahua idauidau momo mai edia toana, bada, kala, bona mamina idauidau ia henia. Unai ese ia hahedinaraia Iehova be lalokau Diravana sibona lasi, to ia be hariharibada, ma haida ia laloa, bona hebogahisi Diravana danu.​​—Salamo 104:24.